Trajtimi për Lëvizjen Vetëvendosje si humbëse e zgjedhjeve lokale të zhvilluara të dielën, për kryetarin e kësaj partie, Visar Ymeri, është një injorancë e kulluar.
Ai ka krahasuar votat që ka marrë VV në lokalet e 2013-tës dhe 2017-tës, duke thënë se partia e tij ka dyfishuar votën në nivel vendi nga 60 mijë në 130 mijë
Sipas tij, LVV është në balotazh në gjashtë komuna, prej tyre në tri komuna të mëdha, në Prishtinë, Prizren dhe Gjilan.
“Ta trajtosh Vetëvendosjen si humbëse në zgjedhjet lokale është në rastin më të mirë injorancë e kulluar. Si mund të quhet më shumë se dyfishimi i votës në nivel vendi (nga 60 mijë më 2013 në 130 mijë në 2017) humbje? Ashtu siç u dyfishuam në nivel qendror ashtu u dyfishuam edhe në nivel lokal. Në secilën komunë kemi rritje të numrit të asamblistëve. Nga një komunë ku kemi qeverisur, Prishtinën, tash jemi në balotazh në 6 sosh, përfshirë Prizrenin dhe Gjilanin, të dyja këto komuna të mëdha (Prizreni e dyta për nga madhësia pas Prishtinës). Natyrisht që zgjedhjet në nivel qendror dhe ato në nivel lokal kanë dinamika krejtësisht tjera elektorale. Dhe këtë jo vetëm te rasti i Vetëvendosjes por te secila parti”, shkruan Ymeri.
Ai e pranon se kanë shumë punë për të bërë në nivel lokal e për pushtetin vendor në përgjithësi në mënyrë që siç thotë jo vetëm ta forcojnë organizatën por edhe t’i japin zë qytetarëve anekënd kuvendeve komunale.
“Po, është e vërtetë atë që po e thonë, se Vetëvendosje është dashur të fitojë më shumë komuna. Është shumë e vërtetë që pikërisht qeverisja nga Vetëvendosje e sjellë transformimin e zhvillimin e komunës, drejtësinë e barazinë në vendime e shërbime të komunës për qytetarët. Pikërisht këtë e ka bërë, dhe do ta vazhdojë, Shpend A. Ahmeti në Prishtinë, pikërisht këtë do ta bëjë Qëndron Kastrati në Dardanë, Sami Kurteshi në Gjilan, Mytaher Haskuka në Prizren, Ajet Potera në Besianë dhe Basri Kodra në Kaçanik. Vetëvendosje nuk po ndalet në rrugën që e ka projektuar”, shkruan Ymeri. /tesheshi.com/
