Mafiozët italianë po vriten me njëri-tjetrin për shkak të tonelatave me hashash që trafikohen nga Shqipëria. Deklarata është bërë nga kreu i prokurorisë së antimafias italiane, Franco Roberti, i cili e ka lidhur krimin e ndodhur në Foggia edhe me trafikun e drogës nga Shqipëria.
“Konflikti është ndezur rreth trafikut të drogës, sidomos të drogave të lehta që vijnë nga Shqipëria. Një biznes kolosal që ushqen oreksin e klaneve dhe që përfshin gjithë bregun e Adriatikut, nisur nga ai foxhian deri në Europë”, tha Roberti.
Në kuadrin e luftës ndaj drogës dhe trafikut të saj, kreu i anti-mafias tha se duhet të ketë një bashkëpunim ndërkombëtar, ndërsa Shqipëria dhe Italia duhet të bëjnë më shumë.
“Duhet bërë më shumë, edhe në planin e bashkëpunimit ndërkombëtar për të ndaluar lumin e drogave të lehta që vijnë nga Shqipëria, sepse janë pikërisht ato që çojnë në shpërthimin e konflikteve.
Ishim në Shqipëri muajin e kaluar për të kërkuar bashkëpunim, takuam në Romë ministrin e Brendshëm shqiptar, që premtoi bashkëpunim më të madh. Duhet të fitojmë mbi omertan dhe për ta bërë këtë, duhet krijuar një kulturë e ligjshmërisë që në atë territor është ende periferik”, theksoi Roberti, në një intervistë të dhënë për “Rai Uno”.
Në vijim kryeprokurori i antimafias tha se përplasjet mes klaneve në Pulia vijojnë prej 30 vjetësh me një bilanc prej 300 vrasjesh, nga të cilat 80% kanë mbetur pa u zbuluar. /tesheshi.com/
