Pas raportimeve në media se ish-pjesëtarë të strukturave paramilitare serbe kanë bërë ushtrime e manovra ushtarake në veri të Kosovës, konkretisht në malet e Kopriçevës në bjeshkët e Leposavicit, kryepolici Shpend Maxhuni është thirrur për raportim në komisionin kuvendar për siguri.
Ai sot para anëtarëve të këtij komisioni është rrëfyer detajisht për situatën në fjalë. Maxhuni ka mohuar që serbë të armatosur të kenë ushtruar në veri, derisa ka sqaruar se personat që janë parë atje, janë pjesë e organizatës joqeveritare “Airsoft Club” dhe kanë pasur aktivitetin “Operation Fenix Kosovo 2016”, që sipas tij ka qenë gjithçka legale.
“Dukjet e njerëzve të uniformuar dhe të armatosur. Organizatë joqeveritare e cila i përket shoqërisë sportive dhe qëllimi i saj ka qenë të promovojë disiplina sportive. Organizata operon në veri të Mitrovicës. Janë banorë të Kosovës, Mitrovicës veriore të gjithë anëtarët”, ka thënë Muaxhuni.
Kurse pë mjetet e përdorura nga personat në fjalë, kryepolici kosovar ka pohuar se nuk janë armë, derisa ka treguar edhe ku janë blerë ato.
“Mjetet që përdoren janë pajisje përsëritëse dhe nuk janë armë, këto pajisje shfrytëzojnë sfera plastike si municion për qëllime sportive. Kjo organizatë është në MAPL, ka numrin fiskal. Nga informacionet e verifikuara njësitë e policisë kanë konstatuar se pajisjet që përdoren janë pajisje që janë blerë në një market në Prishtinë. Uniformat pra që janë bërë publike, dhe janë në pronësi të secilit person. Kemi specializuar dhe kemi parë që duken si armë, po që nuk shërbejnë si armë zjarri. Mbahen personalisht nga secili anëtarë i këtij klubi. Ditën e mbajtjes së aktivitetit, policia ka qenë prezentë. Aktiviteti është mbajtur gjatë muajit gusht të viti 2016. Kanë qenë dy policë që kanë qenë të autorizuar ta monitorojnë aktivitetin, dokumenti me vulën e Kosovës. Ai dokument kanë qenë njoftues i asaj organizate”, ka thënë Maxhuni.
Televizioni publik (RTK) përmes emisionit “Udhëve”, më 27 janar, raportoi se pjesëtarët e të ashtuquajturit klubi sportiv “Airsoft Klub Vukovi” janë duke u përgatitur për mundësinë e një konflikti të ri të armatosur në Kosovë. /tesheshi.com/
