Mund të përfshihet dhe tek kryengjarjet e kësaj fushate elektorale të deritanishme, fakti që Ilir Meta, ish-kreu i LSI-së, aktualisht Presidenti i zgjedhur i Republikës, ka humbur “dashurinë dhe qetësinë” e tij emblematike, promovuar aq fort prej tij si format politik, në kushtet e kreut të Kuvendit, gjatë koalicionit me PS-së.
Ai, pos që po bën një shkelje etike që si President po angazhohet në fushatë në pozitën e një partiaku, më saktë kreut të LSI-së, post nga i cili ka dhënë dorehqjen e që zyrtarisht mbahet nga Petrit Vasili, një ditë më parë ka kaluar në një sulm me gjuhë të ashpër ndaj dyshes Rama-Basha, ku të parin e ka quajtur mosmirënjohës e të dytin “aksident të PD-së”.
Por jo vetëm kaq. Ai sërish i ka krahasuar me personazhet e Tomy-t dhe Jery-t, duke u vënë dhe vulën si karagjozë. Të gjithë këto të thëna me një zë inatçor, në tubime e në studio televizive.
Ditë më parë, kryeministri Rama tha se një President nuk duhet të fliste me atë gjuhë, duke i kujtuar ish-aleatit të tij pozitën e re që gëzon në politikë, e cila nuk i lejon që të shprehet me fjalor të rëndomtë politik.
Dhe ky kthim i Metës në gjuhën e vitit 2009, përbën dhe kryengjarjen e kësaj fushate, që duhet thënë se është me dekor politik krejt ndryshe. /tesheshi.com/
