Suedia nuk ka arritur të integrojë numrin e madh të emigrantëve që ka pranuar në dy dekadat e fundit, duke rezultuar në krijimin e shoqërive paralele dhe dhunën e bandave, tha kryeministrja Magdalena Andersson, e cila ka nisur një sërë nismash për të luftuar krimin e organizuar.
Në fillim të muajit, shumë suedezë u befasuan dhe u tronditën nga trazirat në të cilat u plagosën më shumë se 100 policë.
Dhuna shpërtheu pas djegies së Kur’anit në një tubim të organizuar nga një politikan suedezo-danez dhe njoftimit se ai do të zhvillonte rite të tilla blasfemike në lagjet e emigrantëve.
Dhuna shpërtheu në Malmö në mesin e prillit në protesta kundër lëvizjes së ekstremit të djathtë të udhëhequr nga Rasmus Paludan, ku kazanët e plehrave, makinave dhe dyqaneve u dogjën dhe policia u qëllua me gurë dhe mjete piroteknike.
Andersson vlerësoi se si islamistët ashtu edhe e djathta ekstreme lejohen të veprojnë në Suedi.
“Ndarja është lejuar të shkojë aq larg sa tani kemi shoqëri paralele në Suedi. Ne jetojmë në të njëjtin vend, por në realitete krejtësisht të ndryshme,” tha Andersson.
Numri i njerëzve të lindur jashtë vendit në Suedi në dy dekadat e fundit është dyfishuar në dy milionë dhe përbën një të pestën e popullsisë.
Socialdemokratët e kryeministres kanë qenë në pushtet për 28 nga 40 vitet e fundit, duke përfshirë tetë vitet e fundit.
Andersson po prezanton një sërë masash për të dekurajuar emigrantët e rinj që të bashkohen me bandat dhe po përpiqet t’i largojë ata nga rruga dhe t’i mbajë në shkollë për aq kohë sa të jetë e mundur.
Ajo theksoi se Suedia kishte një fluks të madh emigrantësh, por masat për integrimin e të huajve ishin të pamjaftueshme.
“Shoqëria është shumë e dobët, siç janë burimet për policinë dhe shërbimet sociale”, tha kryeministri.
Pas një fluksi të madh emigrantësh nga Lindja e Mesme në vitin 2015, Suedia ka shtrënguar ndjeshëm politikën e saj të imigracionit. /tesheshi.com/
