Kryeministri Rama priti sot në një takim dypalësh homologen e tij polake, Beata Szydło. Ata mbajtën një konferencë të përbashkët, ku në fokus të fjalimeve ishin negociatat për anëtarësimin në BE, si dhe avancimi i mëtejshëm i reformave, kryesisht në drejtësi.
Fillimisht foli Rama, i cili u përqëndrua më shumë tek progres-raporti pozitiv i KE-së për Shqipërinë.
“Komisioni Europian ka bërë një rekomandim pozitiv për çeljen e negociatave, ky rekomandim të mirëpritet nga Këshilli dhe Shqipërisë t’i jepet mundësia që në muajt në vijim të japë provën e prekshme të fillimit të zbatimit të reformës në drejtësi duke nisur aty ku nënvizon komisioni, zbatimin e ligjit të vettingut si kushti i vetëm për tu rikthyer në këshill”, u shpreh Rama.
Nga ana tjetër, kryeministrja polake Szydło vlerësoi reformat e kryera së fundmi dhe se mbështet integrimin e Shqipërisë në BE.
“Mbështesim aspiratën tuaj për në Bashkimin Evropian, si dhe do t’ju përgëzoja për reformat që keni ndërmarrë. Mbështetem të Këshilli Evropian që të konfirmojë pozitën e KE për të përshpejtuar procesin. Negociatat duhet të fillojnë dhe po kështu ne vlerësojmë nivelin shumë të lartë të koherencës së politikës së jashtme të Shqipërisë me politikën e përbashkët të sigurisë dhe të jashtme të BE dhe ky është një faktor që duhet të përshpejtojë proçeset e anëtarësimit”, deklaroi Szydło.
Ajo u shpreh e gatshme edhe për të ndarë përvojat e shtetit polak nga periudha e para anëtarësimit në BE. Szydło pritet të takohet edhe me presidentin Bujar Nishani./tesheshi.com/
