Kryeministri Binali Yildirım tha të shtunën vonë se ofensiva tokësore turke në zonën veriperëndimore të Sirisë, Afrin do të fillojë të dielën, varësisht nga zhvillimet në terren.
Duke folur për gazetarët me udhëheqësin e Partisë së Lëvizjes Kombëtare (MHP), Devlet Bahçeli, Yildirım tha se avionët turq shkatërruan “pothuajse të gjitha” objektivat terroriste që ata kishin identifikuar, e që i përkasin YPG.
Ai tha se artileria turke do të vazhdonte të godasë rajonin.
“Që nga nesër, në varësi të zhvillimeve, elementët tanë tokësorë do të kryejnë aktivitetet e nevojshme”, tha shefi i qeverisë së Ankarasë.
Rreth 72 avionë luftarakë turq morën pjesë në operacionin “Dega e Ullirit” që synonte shtatë rajone në operacionin kundërterror, thanë më vonë Forcat e Armatosura Turke, duke shtuar se avionët luftarakë u kthyen në mënyrë të sigurtë në bazat e tyre.
Ministri i Jashtëm Mevlut Çavushoglu konfirmoi të shtunën se si trupat tokësore ashtu edhe avionët luftarakë F-16 po përdoreshin në operacionin “Dega e Ullirit”, duke nënvizuar se civilët nuk ishin në shënjestër dhe të gjitha viktimat aktuale ishin vetëm terroristë YPG me uniforma.
Yildirim përsëriti se Turqia vendosi të fillojë operacionin pas një rritjeje të sulmeve terroriste në tokën turke nga Siria juglindore.
Turqia ka nisur një fushatë ushtarake në rajonin Afrin për të eleminuar organizatat terroriste PKK, PYD, YPG dhe Daesh dhe për të shpëtuar civilët në rajon nga shtypja dhe mizoria e terroristëve. /tesheshi.com/
