Binali Jëlldërëm nuk e ka fshehur në një intervistë pakënaqësinë e autoriteteve turke për atë çka po ngjet me çështjen e ekstradimit të Fethullah Gylenit, njeriut të bërë përgjegjës prej tyre për puçin e dështuar ushtarak ditë më parë.
Duke folur për të përditshmen The Wall Street Journal, kryeministri turk e ka cilësuar zhgënjyese, zemërthyese, mungesën e mbështetjes së administratës amerikane për ekstradimin e Gylenit.
“Prova është e qartë kristal. Ne e njohim kultin terrorist përgjegjës për sulmet mizore ndaj nesh dhe popullit turk. Jemi të zhgënjyer me mënyrën si SHBA-të e kanë trajtuar këtë çështje. Ne thjesht nuk mund ta kuptojmë pse SHBA-të nuk mund ta dorëzojnë këtë individ,” lexohet me rreshtave të ketë thënë shefi i qeverisë turke.
“Amerika vijon të na kërkojë pandërprerë dokumente. Ç’dokumente ju nevojiten kur 265 njerëz janë vrarë, janë bombarduar nga avionët luftarakë dhe janë shtypur nga tanket? Ne kemi dëshmi nga anëtarë të dyshuar të puçit se ata morën urdhër nga ky person,” ka shtuar Binali Jëlldërëm.
Ai ka nënvizuar se ekstradimi i Gylenit është tani më i rëndësishëm se kurrë, pasi lëvizja e tij u përpoq ta merrte pushtetin me një puç ushtarak.
Siç bën të ditur e përditshmja turke Sabah, zyrtarët amerikanë kërkojnë ende prova të tjera për çështjen e ekstradimit, edhe pse më herët u është dërguar një material i plotë.
Turqia e pati kërkuar dhe shumë herë të tjera, para përpjekjes për grusht shteti, ekstradimin e Gylenit nga SHBA-të.
Autoritetet turke kanë paralajmëruar se në rast të dështimit të ekstradimit të Gylenit, ata do t’i rishohin marrëdhëniet me amerikanët. /tesheshi.com/
