Pak ditë pasi Habib Essid-i humbi detyrën si kryetari i qeverisë tuniziane pas një vote dërrmuese kundër në parlamentin e vendit, është mësuar dhe emri i pasuesit të tij.
Presidenti tunizian, Beji Caid Essebsi, ia ngarkoi sot detyrën e kryeministrit Youssef Chahed-it, një ish-ministri për çështjet lokale.
Shefi i ri i qeverisë, që pritet ta marrë miratimin në parlament, e që lajmëroi po vetë emërimin nga presidenti, i paralajmëroi qytetarët tunizianë që të mbledhin forcat për sakrifica të jashtëzakonshme.
“Do t’u flasim hapur njerëzve për realitetin e situatës ekonomike dhe financiare të vendit,” u shpreh Chahed-i.
Ai bëri të ditur se do të niste menjëherë konsultimet për krijimin e qeverisë së re, e se ajo do të ishte një qeveri të rinjsh, me më shumë ministre femra, si dhe pa favorizuar asnjë parti.
Lufta ndaj terrorizmit u përcaktua prej tij si përparësi e qeverisë së re.
Youssef Chahed-i hodhi poshtë çdo lajm se ai kishte lidhje familjare me presidentin e vendit, por nuk e mohoi faktin se ishte një kushëri i largët i tij. /tesheshi.com/
