Kryeministri i Malit të Zi, Dushko Markoviç, ka ndërmarrë një tjetër mision diplomatik në Kosovë për të bindur Ramush Haradinajn që të kalojë Demarkacionin.
Pas refuzimit për të futur në rendin e ditës marrëveshjen e kufirit, Markoviç ka mbërritur në Prishtinë ku do të takohet me kryeministrin Haradinaj dhe kreun e Kuvendit, Kadri Veseli.
Markoviç ka mbërritur në Kosovë që herët në mëngjes në orën 08.00, ku në aeroport është pritur nga shefi i diplomacisë, Behgjet Pacolli.
Siç bën të ditur zyra e shtypit e qeverisë, në orën 09.40 është e paraparë konferenca e shtypit e tij së bashku me homologun kosovar, Ramush Haradinaj.
Kosova me Kushtetutën e vitit 1974, si edhe Mali i Zi, ishin elemente konstituive me të drejtë vetoje të federatës së atëhershme, nga shpërbërja e së cilës kanë dalë 7 shtete të pavarura – edhe Sllovenia, Kroacia, Bosnja e Hercegovina, Serbia dhe Maqedonia.
Mali i Zi është shteti i 48-të që ka njohur Kosovën në 9 tetor të vitit historik 2008 të shpalljes së pavarësisë në 17 shkurt.
Në 26 gusht 2015, në Vjenë është nënshkruar Marrëveshja për Kufirin Shtetëror mes Kosovës e Malit të Zi. Marrëveshjen e kanë nënshkruar, për palën kosovare atëherë zëvendëskryeministri i parë dhe ministri i Jashtëm, Hashim Thaçi, dhe ministri i atëhershëm i Brendshëm, Skënder Hyseni. Ndërsa për palën malazeze, zëvedëskryeministri dhe ministri i Jashtëm, Igor Llukshiç dhe ministri i Brendshëm, Rashko Konjeviç.
Dëshmitarë të nënshkrimit ishin atëherë kryeministri i Kosovës, Isa Mustafa, presidenti i Malit të Zi, Filip Vujanoviç, si dhe ministri i Jashtëm i Austrisë, Sebastian Kurz. /tesheshi.com/
