Justin Trudeau u takua dje me Papa Françeskun, pjesë e vizitës së tij në Itali në kuadër të takimit të G7-s.
Kryeministri kanadez e ka shfrytëzuar këtë takim për ta ftuar Papën që të kërkojë ndjesë për rolin e Kishës që ai drejton në ngritjen e një sistemi shkollash në Kanada ku fëmijët indigjenë qenë keqtrajtuar për dekada.
Trudeau i kërkoi kreut të Kishës Katolike që ta vizitonte Kanadanë; një vizitë e cila do të shfrytëzohej dhe për kërkimin e ndjesës.
Që prej fundit të shekullit të 19-të, rreth 30 për qind e fëmijëve të popullsisë vendase të Kanadasë, apo thuajse 150.000, u vendosën forcërisht në të ashtuquajturat “shkolla rezidenciale”, të mbizotëruara nga përpjekja për t’i zhveshur ata nga kultura tradicionale e nga gjuha e të parëve të tyre.
Shkollat, ku shumë prej fëmijëve u keqtrajtuan fizikisht dhe seksualisht, qenë financuar për më shumë se një shekull nga qeveria, por administrimi i tyre do të bëhej nga kishat, e përgjithësisht nga katolikët romanë.
E fundit e këtyre shkollave mbylli dyert në vitin 1996, ndërsa dhe Komisioni Kanadez i së Vërtetës dhe Pajtimit ka bërë thirrje për një ndjesë papale.
Ish-kryeministri kanadez Stephen Harper do të kërkonte ndjesë në vitin 2008 në emër të kanadezëve, duke e quajtur atë një kapitull të trishtueshëm të historisë së vendit të tij. /tesheshi.com/
