Partia socialdemokrate e kryeministrit aktual të Sllovakisë, Smer-SD, doli fituese në zgjedhjet e përgjithshme të zhvilluara të shtunën, por pati një rrudhje të madhe në shifra krahasuar me zgjedhjet e shkuara.
Smer-SD fitoi 28.3 për qind të votave, duke e bërë tejet të vështirë krijimin e një qeverie të re. Pavarësisht qëndrimit kundër refugjatëve, gjuhës së ashpër ndaj tyre dhe kuotave të shpërndarjes, kryeministri aktual nuk arriti ta përsëriste fitoren e katër viteve më parë, me 44.4 për qind. Anketimet e mëhershme e kishin paralajmëruar një rënie të mbështetjes, por pritej që Fico të siguronte 35 për qind të votave.
Vetë Robert Fico e pranoi se krijimi i një koalicioni të ri do të kërkonte kohë dhe do të ishte i vështirë. “Si parti që fituam zgjedhjet, kemi detyrimin për t’u përpjekur për të ndërtuar një qeveri të qëndrueshme. Nuk do të jetë e lehtë, po e them shumë qartë.”
Sllovakia merr presidencën e BE-së nga qershori, çka është dhe arsyeja pse ka një vëmendje të shtuar ndaj ecurisë dhe rezultateve të procesit zgjedhor në të. /tesheshi.com/
