Vetëm pak javë pasi do të pretendonte se Sadiq Khan-i, asokohe kandidat për kryebashkiak i Londrës, ishte i lidhur me ekstremistët islamikë, David Cameron e ka cilësuar atë një “musliman krenar”.
Shefi i qeverisë britanike dhe kryetari i bashkisë së Londrës janë parë bashkë në një manifestim në perëndim të kryeqytetit. Ata kanë qenë një tribunë, në një fushatë për t’i bindur qytetarët britanikë që të votojnë për qëndrimin në BE.
Cameron do të shtrëngonte duart me Khan-in, do ta uronte për fitoren, dhe do t’i thoshte masës së njerëzve: “Jam krenar që ndodhem këtu me kryebashkiakun e Londrës, me kryebashkiakun laburist të Londrës, për këtë çështje jetike.”
“Në një gjeneratë, dikush që është musliman krenar, britanik krenar, e një londinez krenar, mund të bëhet kryebashkiak i qytetit më të madh në tokë.”
Kryeministri u tha pjesëmarrësve në manifestim se priste të kishte shumë mosmarrëveshje me kryebashkiakun e ri, por se ishin pjesë e një fushate jashtëzakonisht të gjerë në favor të qëndrimit në BE.
Sadiq Khan e mbrojti vendimin e tij për të dalë në një tribunë me kryeministrin konservator, duke deklaruar: “Ka shumë gjëra për të cilat unë dhe kryeministri nuk do të pajtohemi. Por çfarë ka vërtet rëndësi është se kur duhet që kryebashkiaku dhe qeveria të punojnë ngushtë së bashku për interesat e londinezëve, kanë për të punuar ngushtë së bashku.”
Cameron do ta sulmonte ashpër Khan-in gjatë fushatës elektorale për zgjedhjet lokale, duke e akuzuar atë për pjesëmarrje me ekstremistët në platforma të përbashkëta. /tesheshi.com/
