Monika Kryemadhi, kryetare e LSI-së, ka shtuar dozën e akuzave në drejtim të kryeministrit Edi Rama, një ditë pasi ky i fundit akuzoi këtë parti se kishte future në llum institucionet që drejtonte gjatë mandatit të parë qeverisës.
“LSI në Durrës përjetoi terrorin më të madh gjatë fushatës, por arriti ndër rezultatet më të mira në Shqipëri. Strukturat e shtetit u bën njësh me bandat dhe krimin e organizuar. Ne zgjodhëm të ishim ne opozite, sepse nuk mund të bëheshim njësh me krimin. Sot Shqipëria drejtohet nga bandat dhe krimi i organizuar”, tha Kryemadhi gjatë një takimi me strukturat e kësaj partie.
Në vijim ajo shtoi se shqiptarët kanë përpara dy alternativa, ose të bashkëqeverisin me bandit dhe krimin, ose të zgjohen dhe të reagojnë.
Kryemadhi e cilësoi Ramën jo vetëm rrezik kombëtar, por edhe rajonal.
“33 zv.ministra në qeveri, Rama vërtetoi shprehjen qeveri e vogël, korrupsion i madh. 33 zv.ministrat nuk janë socialistë, por përfaqësues të oligarkëve për të mbrojtur interesat e tyre. Edukata politike në këto 27 vjet ka qenë e bazuar te konflikti, mohimi dhe kundërshtimi i gjithçkaje. Ne duam të sjellim risi dhe ti japim fund kësaj tradite. Opozita jonë do të jetë e bazuar te alternativat. Ne nuk duam të përfaqësojmë grupe interesi të mafiozeve dhe oligarkëve, por grupe interesi, që lidhen vetëm me interesat e drejtpërdrejta të qytetareve. Edi Rama sulmon njerëzit e thjeshtë, sepse i urren dhe ka neveri për ta”, tha ajo. /tesheshi.com/
