Ndalimi në Turqi i një numri udhëheqësish e deputetësh të HDP-së, një parti prokurde e në antagonizëm të hapur me qeverisjen në vend, ka sjellë reagimin e vendeve europiane.
Turqia është kritikuar për këtë hap, edhe pse partiakët e HDP-së janë ndaluar sepse nuk kanë pranuar të dëshmojnë në një hetim kundër terrorizmit.
I ashpër ka qenë dhe reagimi nga Izmiri i ministrit të Jashtëm turk, Mevlyt Çavushogllu, duke e kritikuar qëndrimin e BE-së ndaj Turqisë për luftën ndaj PKK-së, organizatës terroriste kurde.
Ai u ka deklaruar gazetarëve, “Pjesa më e madhe e vendeve europiane i japin sot fatkeqësisht mbështetje të fuqishme PKK-së. Nuk pranojmë që ata [BE-ja] të na mësojnë përsëri rendin ligjor apo demokracinë.”
Ministri i Jashtëm turk tha se vendet e BE-së vetëm kritikojnë Turqinë, por kurrë nuk e përshkruajnë PKK-në si organizatë terroriste.
“Në mënyrë të ngjashme, nuk kam parë ndonjë zyrtar apo vend [europian] ta këshillojë HDP-në të distancohet nga terrorizmi.”
Autoritetet qeverisëse turke e akuzojnë HDP-në për lidhje me PKK-në, një organizatë terroriste. /tesheshi.com/
