Ministri i Jashtëm i Maqedonisë Veriore Bujar Osmani i ka bërë thirrje Bashkimit Evropian të ndalojë “shantazhin” ndaj vendit të tij duke vendosur pengesa të reja për anëtarësimin në BE.
“Procesi evropian nuk duhet të përfshijë shantazh për ndonjë vend evropian ose Ballkanin Perëndimor,” i tha Osmani një konference shtypi në internet në Pragë.
Ai paralajmëroi se mosmarrëveshja me Bullgarinë, e cila vuri veton në fillimin e negociatave të BE me Maqedoninë Veriore, do të ndikonte negativisht në të gjithë Ballkanin.
Ai gjithashtu theksoi se përpjekjet e Maqedonisë Veriore për të pasur marrëdhënie të mira me fqinjët e saj nuk u shpërblyen.
Nga ana tjetër, ai mirëpriti mbështetjen e 26 prej 27 vendeve të bllokut, duke thënë se ishte mënyra më e mirë për të rivendosur entuziazmin dhe besimin në proces.
“Mbështetja dhe përshpejtimi i procesit të integrimit është mënyra më e mirë për të përmirësuar marrëdhëniet midis fqinjëve,” tha Osmani.
Pas bisedimeve me Osmanin, Ministri i Jashtëm çek Tomas Petricek shprehu shpresën se një kompromis do të arrihej deri në fund të vitit.
Ai shtoi se ka bisedime shumë intensive në BE se si të bëhet përparim.
Petricek vlerësoi se BE duhet të ruajë statusin e një partneri të besueshëm për vendet që “zbatojnë reformat dhe bëjnë detyrat e shtëpisë”.
Maqedonia e Veriut ndryshoi emrin e saj vitin e kaluar për t’i dhënë fund një mosmarrëveshje me Greqinë, e cila bllokoi prej vitesh ambiciet e Shkupit në BE, por tani përballet me kundërshtimin Bullgar mbi historinë dhe gjuhën e saj. /tesheshi.com/
