Al Jazeera ka intervistuar ministrin e Jashtëm të Katarit pas vendimit të një numri vendesh në rajon për ndërprerjen e marrëdhënieve diplomatike.
I pyetur nga rrjeti i njohur informativ se cilat ishin arsyet e kësaj krize, Shejh Muhammed bin Abdurrahman el-Thani, ka dhënë këtë përgjigje:
“Kemi shprehur habinë dhe keqardhjen tonë për përshkallëzimet kundër Katarit. Nuk e dimë nëse kishte arsye të vërteta pas kësaj krize, apo arsye të fshehta që ne nuk i dimë. Sikur të kishte patur arsye të vërteta për këtë krizë, mund të ishin diskutuar në takimin e Këshillit të Bashkëpunimit të Gjirit të mbajtur pak javë më parë, por asgjë fare nuk është thënë apo diskutuar. Po ashtu asgjë nuk u tha gjatë takimit amerikano-islamo-arab në Riad. Asgjë nuk u tha në këto aktivitete, dhe ne nuk kishim asnjë tregues se kriza ishte gati të shpërthente.”
El-Thani ka four për një fushatë të paparë mediatike kundër Katarit dhe për fabrikim gënjeshtrash.
Ai është shprehur për mikrofonin e Al Jazeera-s: “Kjo tregon se media fabrikoi lajme kundër Katarit dhe sajoi gënjeshtra për të. Fushata masive mediatike kundër Katarit… ishte e paprecedent nga standardet e Këshillit të Bashkëpunimit të Gjirit. Ne në Katar nuk rrëshqitëm në këtë rrugë. E trajtuam çështjen me qetësi e durim.”
Ministri i Jashtëm i Katarit ka vënë në pah papërshtatshmërinë e kohës së zgjedhur për këtë goditje ndaj vendit të tij:
“Ka një sërë luftërash në botën arabe. Janë krizat në Siri, në Libi e në Jemen, dhe ne e shohim si të habitshme që Këshilli i Bashkëpunimit të Gjirit ka vendosur ta sulmojë Katarin në këtë kohë të veçantë.” /tesheshi.com/
