E çuditshme ka qenë ndeshja mes Kroacisë dhe Çekisë, e vlefshme për grupin D në Euro 2016. Kemi parë një Kroaci të papërmbajtshme për më tepër se një orë, që dukej si fituesja e padiskutueshme e takimit, e që me përmbysjen e lojës, edhe mund të kishte humbur në minutat e fundit.
Kroatët do të shënonin së pari në minutën e 37 me anë të Perisic-it, për ta thelluar diferencën në pjesën e dytë. Rakitic, mesfushori i Barcelonës, do ta çonte në 2-0 kryesimin e ballkanasve.
E pikërisht kur u duk se Kroacia po i drejtohej fitores dhe kualifikimit për më tej, çekët kujtohen të zgjohen dhe të luajnë.
Skoda godet bukur me kokë në minutën e 75-të. Rezultati ngushtohet pas golit të tij. Ka nisur tashmë muzika e çekëve, që duan medoemos së paku një pikë.
Dhe vijmë pranë fundit të ndeshjes, kur nisin të hidhen sende në fushë e tymuese. Ndeshja ndërpritet për disa minuta, ndërkohë që ka dhe përplasje mes tifozëve.
Ekipi kroat nuk është më ai i pari pas rinisjes së lojës. Vida prek topin me dorë brenda zonës, dhe 11-
metërsh. Tomas Necid e kthen penalltinë në gol në minutën e 93-të me një goditje të fuqishme.
Çekët mund të kishin shënuar dhe një tjetër gol në minutat shtesë, pas një presioni të vazhdueshëm. Gjë që nuk ndodhi.
Bilbili i fundi i gjyqtarit Clattenburg e mbyll këtë takim 2-2.
Kroatët shkojnë në kuotën e katër pikëve, çekët i gëzohen pikës së parë. /tesheshi.com/
