Vetëm një ditë pasi qeveria e teknokratit Tihomir Oreskovic humbi në votimin e mocionit të mosbesimit në parlament, presidentja e Kroacisë ka lajmëruar se në shtator mund të ketë zgjedhje të përgjithshme të parakohshme.
Pasi është këshilluar me përfaqësues të grupeve parlamentare, presidentja Kolinda Grabar-Kitarovic ka deklaruar se shumica e tyre është në favor të shpërbërjes së parlamentit dhe të zgjedhjeve të parakohshme.
Bisedimet janë kryer në kuadër të formimit të një kabineti të ri pas humbjes së kryeministrit në votimin e mocionit të mosbesimit.
“Ata [parlamentarët],” ka thënë presidentja e vendit, “më shprehën dëshirën e tyre për të patur zgjedhje në fillim të shtatorit, gjë të cilën do ta marr në konsideratë.”
Parlamenti duhet të votojë së pari për shpërndarjen e tij, e më pas zgjedhjet duhet të mbahen jo më përpara një muaji e jo më vonë se dy muaj.
Deputetët do të vendosin të hënën në do të shpërndahet parlamenti. Zhvillimi i zgjedhjeve të parakohshme do të shpallet nga presidentja pas shpërndarjes së parlamentit. /tesheshi.com/
