Nga Miradie Hasani
Në Maqedoni, në komunat ku dominojnë shqiptarët, ka mungesë të theksuar të çerdheve për fëmijë. Pra, nëse një ditë shqiptarët dalin të protestojnë për të drejtat e tyre, ata duhen të mbajnë dhe parrullën “Duam çerdhe!”
Shumë prindër detyrohen që të udhëtojnë me dhjetëra kilometra për të dërguar fëmijët e tyre në ato çerdhe që nuk janë në zonat e tyre të banimit.
Si shembull mund të merret Haraçina, 10 kilometra larg Shkupit. Prindërit e atyshëm që shkojnë në punë, detyrohen që të udhëtojnë drejt Shkupit për t’i dërguar fëmijët në çerdhe.
“Siç e dinë të gjithë, komuna e Haraçinës nuk ka çerdhe, edhe unë fëmijën duhet ta lë te fqinjët për me u kujdes për aq orë sa jam unë në punë. Siç e shihni, edhe kushtet i kam të vështira, por më duhet ta lë aty. Nga njëra anë fëmijë, nga tjetra anë punë, patjetër duhet të punoj, nuk di edhe unë se ku do të gjejë rrugëdalje, ku të shkoj të kërkoj të drejta, nuk e di ku të shkoj me të vërtetë kam ngelur”, u shpreh një prind nga Haraçina.
Nga komuna e Haraçinës thonë se e kanë një projekt për çerdhe dhe se fillimi i ndërtimit pritet të nisë në pranverë.
Çerdhe nuk ka edhe Zhelina, komunë e Tetovës. Por i pari i kësaj komune, Blerim Sejdiu, është optimist se këtë vit do të nis ndërtimi i çerdhes. Ai ka ndarë edhe vendin.
“Tani kemi aplikuar me një shpallje në Ministrinë e Punës dhe Politikës Sociale. Kemi 30 mijë banorë dhe ende nuk ka çerdhe, dhe mendoj se jemi në fazën ku duhet të ndërtohet ajo”, tha Sejdiu, kryetari i komunës së Zhelinës.
Komuna e Sarajit, po ashtu me shumicë shqiptare ka vetëm një çerdhe dhe kryetari i komunës së atyshme, Blerim Bexheti, kërkon cerdhe tjetër, plus dhe një në Kondovë, fshat i kësaj komune.
Edhe fëmijët e Studeniçanit nuk kanë çerdhe. Nga komuna thonë se kanë kërkuar disa herë fonde nga qeveria për ndërtimin e çerdhes, por deri tani nuk kanë marrë përgjigje pozitive. Mungesë të çerdheve ka nëpër disa komuna si ajo e Likovës dhe Kumanovës.
Ndryshe, shumica e fëmijëve regjistrohen në çerdhen “Fidani” në Shkup, ku ka shumë fëmijë që vijnë nga të gjitha zonat rurale të kryeqytetit. /tesheshi.com/
