Nga Bashkim Kastrati
Institucionet shëndetësore në Kosovë zakonisht përballen me mungesë të barnave nga lista esenciale, mungesë të aparaturave diagnostike, në disa raste ka edhe probleme infrastrukturore etj. Por përveç këtyre, ato po përballen dhe me mungesë së infermierëve, si dhe të stafit tjetër mjekësor.
Kjo mungesë e infermierëve paraqet pengesa të mëdha në punët e përditshme në institucionet shëndetësore. Kjo është më e theksuar sidomos gjatë pushimeve verore, kur janë edhe pushimet vjetore.
Duke marrë parasysh numrin e vogël të infermierëve në institucionet shëndetësore, si në spitalet rajonale, por edhe në Qendrën Klinike Universitare të Kosovës (QKUK), që është institucioni terciar shëndetësor, është e domosdoshme rritja e numrit të tyre.
Por kjo nuk po ndodh për shkak të mungesës së mjeteve financiare, apo të paktën kështu thonë dikasteret qeveritare në përgjigjen që i bëjnë kërkesave për rritjen e numrit të infermierëve dhe stafit tjetër mjekësor.
Kur jemi tek mungesa e mjeteve buxhetore për shtimin e stafit mjekësor, e që është shumë elementare për shëndetin e qytetarëve, sigurisht që na bien ndërmend harxhimet e shumta që bëhen për dreka, darka, telefona, vetura të shtrenjta, meditje të majme dhe shpenzime tjera, që në krahasim me nevojat që kanë spitalet, mund të krahasohen shpenzime të “luksit”.
Ja edhe sa infermierë dhe staf tjetër mjekësor nevojiten urgjentisht
Tesheshi.com ka siguruar kërkesën e fundit që SSHKUK ia ka bërë Ministrisë së Shëndetësisë javën e kaluar për rritjen e stafit profesional mjekësor. Në këtë kërkesë janë tri kategorizime, kërkesa urgjente, kërkesa sipas nevojave dhe kërkesa sipas standardeve.
Kërkesë urgjente është që në institucionet shëndetësore të punësohen edhe 361 infermierë, prej tyre në QKUK 250. Sipas nevojës, numri i infermierëve duhet të rritet për 459, prej tyre 332 vetëm në QKUK. Ndërsa sipas standardeve në institucionet shëndetësore duhet të punësohen edhe 677 infermierë, prej tyre 528 vetëm në QKUK.
Ndërkaq, kërkesat më të mëdha urgjente janë nga Klinika e Anestezionit dhe Mjekimit Intensiv, me gjithsej 14% të kërkesave, apo 56 punëtorë shtesë. Me 6 mjekë specialistë, 40 infermierë dhe 10 fizioterapeut, pasi që gjatë vitit 2017, pritet të inaugurohet mjekimi intensiv qendror.
Kërkesat më të mëdha për mjekë specialistë janë nga Klinika Emergjente me gjithsej 18 mjekë specialistë, 15 infermierë dhe 10 ndihmës infermierë. Gjithsej, në kategorinë emergjente të klinikës Emergjente kërkohen 43 punëtorë shtesë.
Kërkesa tjera të mëdha janë nga Klinika Neonatologjisë me gjithsej punëtorë 42 punëtorë shtesë. 10 mjekë specialistë dhe 32 infermierë shtesë.
Edhe spitalet rajonale kanë nevoja urgjente për infermierë
Gjithashtu, mungesë të theksuar apo urgjente të infermierëve dhe staf mjekësor në përgjithësi, kanë edhe në spitalet rajonale të Kosovës.
Sipas kërkesës së SSHKUK-së, drejtuar Ministrisë së Shëndetësisë, spitali i rajonal i Gjilanit ka nevojë urgjente për 30 infermierë, Spitali Rajonal i Pejës ka nevojë urgjente për 19 infermierë, spitali rajonal i Ferizajt ka nevojë urgjente për 15 infermierë, e kështu më radhë.
Kërkesat e deritanishme nuk u aprovuan për shkak të mungesës së buxhetit
Shpend Fazliu zëdhënës i Shërbimit Spitalor dhe Klinik Universitar të Kosovës ka thënë për tesheshi.com se mungesa e infermierëve në institucionet shëndetësore paraqet një pengesë serioze në kryerjen e punëve të përditshme.
“Shërbimi Spitalor dhe Klinik Universitar i Kosovës (SHSKUK), përkatësisht Qendra Klinike Universitare e Kosovës (QKUK) dhe 7 spitalet e përgjithshme në 7 rajone në kompetencë të SHSKUK, po ballafaqohen me mungesë të theksuar të infermierëve për faktin se buxheti në dispozicion nuk po mundëson shtimin e numrit të tyre”, thotë Fazliu.
Ai thotë se në vazhdimësi janë dërguar kërkesa tek institucionet relevante për rritjen e numrit të infermierëve, por deri më tani nuk janë aprovuar ato kërkesa, ndërsa aktualisht ka një fije shprese në këtë drejtim.
“Pra organizatës SHSKUK, nuk i janë lejuar shtim i numrit të punëtorëve. Kërkesat e QKUK dhe spitaleve të përgjithshme janë drejtuar me kohë tek Ministria e Shëndetësisë, Ministria e Ekonomisë e Financave dhe komisioneve parlamentare. Së fundi Ministria ka kërkuar të paraqiten nevojat për staf për infermiere dhe mjekë specialistë. Kërkesat janë dorëzuar dhe presim të realizohet kërkesa”, theksoi Fazliu. /tesheshi.com/
