Pengimi i veprimtarive të shtetarëve turq në Gjermani, në kuadër të takimeve me bashkëqytetarët e tyre që jetojnë e punojnë në atë vend, i ka tensionuar jashtëzakonisht marrëdhëniet midis dy shteteve.
Dy ministra të qeverisë turke kishin planifikuar të zhvillonin takime në lidhje me referendumin e 16 prillit për reformën kushtetuese, por autoritetet gjermane vendosën të mos e lejojnë një gjë të tillë. Një varg reagimesh e pasuan vendimin, që nga deklaratat e ministrit turk të Drejtësisë dhe anulimin prej tij të takimit me homologun gjerman, e deri te ato Mevlüt Çavuşoğlu-së.
Presidenti i Turqisë, që jo shumë kohë më parë kishte pritur në Ankara kancelaren Merkel, u tregua akoma më i ashpër: “Ata duhen çuar në gjyq për ndihmën, përkrahjen e dhënë terrorit.” Erdoğan-i e kishte fjalën për sjelljen me dy standarde të autoriteteve gjermane, që i pengojnë zyrtarët turq të mbajnë fjalime para bashkëqytetarëve të tyre në Gjermani, ndërkohë që i lejojnë anëtarët e PKK-së, organizatës terroriste kurde, të organizojnë manifestime në të njëjtin vend.
Në këtë atmosferë të tensionuar, kryeministri turk, Binali Yıldırım, dhe kancelarja gjermane Angela Merkel kanë zhvilluar dje një bisedë telefonike.
“Ishte një bisedë e mirë dhe produktive,” u tha gazetarëve kryeministri turk. “Nga tani do të ndjekim një rrugë më të ndryshme për programet. Biseda zgjati më shumë nga ç’qe planifikuar.” Binali Yıldırım njoftoi gjithashtu për një takim në javën e ardhshme mes ministrave të Jashtëm të dy vendeve.
“Autoritetet gjermane duhet ta shohin qëndrimin e tyre. Ju i lejoni përfaqësuesit e grupeve terroriste, por vendosni ndalime për ata që valëvisin flamurin turk dhe e duan vendin e tyre. Kjo nuk mund të pranohet…,” kishte deklaruar më herët Yıldırım në një aktivitet në një qytet turk.
Marrëdhëniet mes Turqisë dhe Gjermanisë kanë qenë të tensionuara prej muajsh. Berlini është akuzuar nga Ankaraja për kthim në një strehë për terroristët e PKK-së dhe FETÖ-s.
Ndalimi nga autoritetet turke javën e shkuar i korrespondentit në Stamboll të Die Welt-it, Deniz Yücel, i akuzuar për propagandë terroriste, do t’i hidhte më shumë benzinë zjarrit. /tesheshi.com/
