Numri dy i Partisë për Drejtësi dhe Zhvillim në Turqi (AKP), Numan Kurtulmus, duke folur për situatën në Idlib të Sirisë, ku u arrit një marrëveshje armëpushimi këtë javë midis Turqisë dhe Rusisë,tha se po bëhet një përpjekje për të përçarë vendet e Lindjes së Mesme në tërësi, kryesisht përmes destabilizimit të tyre, me një faktor të jashtëm aktiv.
“Ne jemi të vetëdijshëm se Turqia është gjithashtu në shënjestër. Siç tha Presidenti ynë (Erdogan) më parë, ata që synojnë të ndajnë Irakun dhe Sirinë nuk kanë në shënjestër vetëm këto vende, por edheTurqinë, e cila luan një rol kryesor në rajon. Duhet të punojmë për t’i bërë një rezistencë edhe më të madhe këtyre përpjekjeve ”, tha politikani turk.
Ai kujtoi se “lojërat në atë rajon, por edhe në pjesë të tjera të botës”, ishin të ngjashme me ato të Perandorisë Osmane, kur në skenë ishin ndarjet etnike, duke thyer unitetin në perandorinë e atëhershme.
“Pozicioni i Turqisë për Sirinë është mjaft i qartë. Turqia mbështet integritetin e Sirisë. Ne nuk duam të përcaktojmë se kush do të jetë në pushtet në Siri në të ardhmen, ne thjesht duam që të gjithë sirianët, të gjithë qytetarët e këtij vendi, të marrin pjesë në zgjedhje, e që të arrihet kjo, të gjitha organizatat terroriste duhet të eliminohen në Siri dhe në rajon”, shpjegoi Kurtulmus.
Ai shtoi se Turqia ka një barrë të veçantë kur bëhet fjalë për luftën në Siri, pasi ai vend kap rreth katër milion refugjatë.
Duke folur për krizën e refugjatëve dhe migrantëve gjatë luftës në Siri, Kurtulmus tha se Turqia i kishte dhënë një mësim njerëzimit.
“Turqia ka shpëtuar dhjetëra mijëra refugjatë nga vdekja në Detin Egje. Njerëzit tanë janë të gatshëm të ndajnë kafshatën e fundit. Ne po trajtojmë katër milion refugjatë, megjithëse ky nuk është problem për Turqinë. Sepse ne nuk jemmi ne që kemi okupuar Irakun dhe nuk jemi ne që kemi shkaktuar luftën në Siri, ndërkohë që shohim se disa vende të tjera po dridhen para mbërritjes së vetëm disa qindra refugjatëve. Disa shkaktojnë situata që rezultojnë me kriza të rënda humanitare dhe më pas e lënë Turqinë vetëm për t’u marrë me to. Kjo nuk është e drejtë”, tha ai.
“Kur shikojmë marrëveshjen e ripranimit me Bashkimin Evropian, Turqia ka përmbushur detyrimet e saj, por BE jo. I gjithë problemi është i shumëanshëm. Nuk është çështje parash, por kriza e migrantëve është një problem për të gjithë botën. Pse nuk ulen dhe nuk mendojnë për arsyet e krizës?”, thotë ai.
Kurtulmus tha se problemi i refuzimit të migrantëve gjithashtu mund të çojë në ngritjen e racizmit, diskriminimit dhe ksenofobisë në Evropë, të cilat kthehen më pas në nivelin e fashizmit.
E gjithë kjo, tha ai, po helmon politikën evropiane në tërësi. /tesheshi.com/
