Nga Mensur Krasniqi
Si çdo përfaqësues ndërkombëtar dy vitet e fundit, edhe katër vizitat e njëpasnjëshme të ndërmjetësuesit gjerman në krizën politike në Maqedoni, Johan Hajndëll nuk është se kanë sjellë ndonjë shpresë të re për dalje prej saj.
Burri i ardhur nga Berlini, i cili përfaqson njëherësh dhe seriozitetin me të cilin Merkeli e sheh Ballkanin, gjatë qëndrimit më të fundit dyditor në Shkup, u takua me përfaqësuesit e partive më të mëdha politike, me përjashtim të kreut të VMRO-së, Nikolla Gruevskit, me arsyetimin e këtij të fundit se ishte në një udhëtim privat(!).
Dhe në fund të atyre bisedeva që pati, nuk u pa ndonjë rezultat i dukshëm. Diplomati gjerman vetëm konkludoi në fund se sido që të jetë, roli i tij është vetëm ndërmjetësimi, ndërsa përgjegjësia finale për zgjidhjen e saj mbetet në duart e aktorëve politikë vendas.
“Roli im është ndërmjetësimi, dhe, derisa përgjegjësia për situatën është e lidërve vendas, nga ata varet dhe suksesi i procesit të tejkalimit të krizës”, tha Hajndëll.
Ai ndërkoë ka porositur partitë politike që të arrijnë marrëveshje për tejkalimin e kësaj situate para pushimeve verore, ndryshe gjykon se kjo do të ndikojë negativisht edhe në ekonominë vendore.
“Për Maqedoninë është me rëndësi që kriza sa më shpejtë të tejkalohet sepse ajo nuk është e mirë për investitorët të cilët i nevojiten ekonomisë së vendit”, ka shtuar Hajndëll.
Vizitën e Hajndëllit për portalin tesheshi.com e ka komentuar edhe nënkryetari i Lëvizjes Besa, Zeqirija Ibrahimit. Sipas tij, kjo vizitë ka nxjerrë në pah tre elemente të rëndësishme për të cilat Lëvizja Besa gjatë kohë i ka përmendur.
“Vizita e fundit e të deleguarit gjerman Hajndëll në Shkup flet për tri momente të rëndësishme: se bashkësia ndërkombëtare mbetet e përkushtuar për zgjidhjen e krizës, që sigurisht përbën një lajm të mirë për ne; e dyta, që është në fakt qëndrimi i “Besës”, se politikanët që e kanë shkaktuar këtë krizë nuk janë të prirur të gjejnë zgjidhje për të; dhe e fundit, se është bërë detyrim që në bisedimet për zgjidhjen e krizës të inkuadrohemi edhe ne së bashku me shoqërinë civile në Maqedoni”, tha Ibrahimi.
Ndërsa sipas politikologut Xhenis Sulimani, ardhja e njëpasnjëshme e diplomatëve të huaj në vend dhe përkujdesi i vazhdueshëm i ambasadorëve në Maqedoni për dalje nga kriza politike, është treguesi më i mirë i (mos)aftësisë së politikanëve tanë për të dialoguar.
“Dialogu është boshti kurrizor i politikbërjes. Këta tanët, shihet qartë se nuk ia kanë haberin kësaj. Prandaj është edhe kjo diplomaci intensive e Gjermanisë, por edhe e SHBA-së për ta nxjerrë vendin nga kriza. Këto lëvizje të japin përshtypjen se më shumë janë ndërkombëtarët ata që duan ta zgjidhin krizën, sesa vet politikanët tanë. Nga deklaratat e fundit të partive nga takimi i fundit me diplomatin Hajndëll nuk le shumë për të shpresuar. Edhe pse Hajndëll pritej të bëjë një kthesë në krizën politike, po dëshmohet ajo që e thashë në fillim: dialogu politik nuk gjendet në fjalorin dhe praktikën e politikanëve tanë. Këta të fundit edhe mes vete edhe në raport me të huajt janë të painteresuar për zgjidhjen e krizës. Ende nuk mund që interesin shtetërorë ta vënë para atij partia/personal”, komentoi kështu Xhenis Sulimani për tesheshi.com.
Dhe pasi as Hajndëll ende nuk po ka rezultat konkret në zgjidhjen e krizës maqedonase, osë së paku në futjen e saj në një udhë qartazi të dukshme të zgjdhjes, shpresa e fundit mbetet ardhja e Ndihmëssekretares së Shtetit të SHBA-së më 10 korrik në Maqedoni, Viktoria Nulland. Dhe aty do të shihet nëse do jetë dashur dhe ndërhyrja e faktorit amerikan për t’jua mbledhur rripat krerëve të politikës së Shkupit. Sipas Sulimanit, pas ardhjes së diplomates amerikane, do jetë finalja e asaj se cili do jetë fati i së ardhmes së afërt të Maqedonisë. /tesheshi.com/
