Më shumë se 400,000 njerëz në Ballkanin Perëndimor mund të bien në varfëri pa një përgjigje qeveritare, ndërsa klasa e mesme mund të zvogëlohet ndjeshëm, vlerëson Banka Botërore në një botim të ri të Buletinit për Shëndetin, Varfërinë, Arsimin, Punën, Mirëqënien Sociale dhe Cilësinë e Ajrit në Ballkanin Perëndimor.
“Shumë prej atyre që mund të bëhen të varfëruar aktualisht nuk përdorin ndonjë mbrojtje sociale, dhe punëtorët në sektorin informal, të cilët nuk kanë sigurim papunësie dhe nuk ushtrojnë të drejtën e mbështetjes tjetër, janë veçanërisht të rrezikuar”, thuhet në njoftimin për shtyp të Bankës Botërore.
Thuhet gjithashtu se rajoni është veçanërisht i ndjeshëm ndaj kësaj dhe krizave të ardhshme të shëndetit publik, duke pasur parasysh konsumin e ulët dhe joefikas për frymë para krizës, në krahasim me Bashkimin Evropian.
“Ndotja e lartë e ajrit në disa qytete të mëdha, një shkallë më e lartë e sëmundjeve të frymëmarrjes, rrit këtë ndjeshmëri, veçanërisht nëse pandemia kthehet gjatë dimrit të ardhshëm”, theksohet më tej në informacion.
Banka Botërore gjithashtu thekson se mbyllja e nevojshme e shkollave, me qëllim uljen e përhapjes së virusit, do të çojë në një ulje të konsiderueshme të rezultateve të të nxënit, të cilat mund të duhen vite për t’u kompensuar.
“Vlerësohet se numri i atyre që nuk kanë aftësinë themelore për të lexuar mund të rritet nga 53 përqind aktualisht, në 61 përqind, nëse shkollat qëndrojnë mbyllur deri në fund të qershorit.
Ndikimet arsimore do të jenë disproporcionale më të mëdha për ata që janë në disavantazh, me një pjesë të konsiderueshme të nxënësve që bien në drejtim të analfabetizmit funksional dhe braktisjes së mundshme të shkollës, sipas njoftimit për shtyp të Bankës Botërore. /tesheshi.com/
