Shtetet arabe të Gjirit Persik kanë përpiluar një listë me 13 kërkesa të ashpra në mënyrë që t’i japin fund konfliktit diplomatik dhe sanksioneve ndaj Katarit. Kështu, agjencia e lajmeve Associated Press, bën të ditur se katër shtete arabe i kanë paraqitur Katarit listën që duhet plotësuar prej tij, ku bie në sy kërkesa për mbylljen e televizionit Al-Xhazira.
Arabia Saudite, Egjipti, Emiratet e Bashkuara Arabe (UAE) dhe Bahrejni i kanë kërkuar shtetit Katarit, po ashtu edhe dobësimin e lidhjeve me Iranin dhe mbylljen e bazës ushtarake turke në territorin e tij, brenda 10 ditësh.
Katari, i cili gjatë viteve të shkuara është përpjekur të rrisë profilin e tij shtetëror, nuk i pranon akuzat për financim të terrorizmit dhe nxitje të destabilitetit në rajon të cilat janë parashtruar nga vendet e Gjirit.
Sipas Associated Press, që disponon një kopje të listës së kërkesave, Katari duhet gjithashtu:
– Të shkëpusë lidhjet me Vëllazërinë Muslimane, e cila është një organizatë e ndaluar në vendet Arabe.
-Të mos u japë shtetësi qytetarëve nga këto katër vende dhe të dëbojë ata që aktualisht jetojnë në territorin e tij, si një përpjekje për mospëzjerjen e Katarit në çështjet e brendshme të tyre.
– Të dorëzojë (ekstradojë) të gjithë individët që kërkohen nga këto katër vende për terrorizëm.
-Të mos financojë asnjë nga organizatat ekstremiste që është cilësuar nga SHBA si grup terroriste.
-Të japë informacion të hollësishëm në lidhje me figurat opozitare që janë financuar nga Katari dhe që lidhen me vendet në fjalë.
-Të rreshtohet politikisht, ekonomikisht e në aspekte të tjera me Këshillin e Bashkëpunimit të Gjirit Persik (GCC).
-Të rreshtë së financuari, përveç Al Xhezira-s, edhe disa kanale të tjera mediatike si Arab21 dhe “Middle East Eye”.
– Të paguajë një shumë, të papërcaktuar ende, si kompensim.
Agjencia e Lajmeve Reuters, duke cituar një burim zyrtar nga një prej këtyre vendeve, tha se Katarit i është kërkuar gjithashtu të shkëpusë lidhjet me të ashtuquajturin Shtetin Islamik (DAISH), Al Kaida-n dhe grupin militant shiit të hezbollahëve.
Sipas Associated Press, Katarit i është kërkuar edhe mbyllja e zyrave diplomatike në Iran, dëbimi i pjestarëve të Gardës Revolucionare të Iranit dhe kufizimi i tregtisë me Iranin në përputhje me sanksionet e vendosura nga SHBA.
Kërkesat nuk janë publikuar ende zyrtarisht dhe dalja në dritë e tyre ka rritur fërkimet midis palëve. Enver Gargash-i, ministër i Jashtëm i Emirateve të Bashkuara Arabe, e ka akuzuar Katarin për nxjerrje të detajeve, duke e etiketuar këtë si “përpjekje fëmijërore të vëllait tonë arab (Katarit) për të sabotuar ndërmjetësimin, gjë me të cilën tashmë jemi mësuar”.
Korrespondentët thonë se edhe në Uashington po rritet irritimi me vendet arabe, edhe pse ndodhet në përpjekje për të zgjidhur krizën. Presidenti amerikan Donald Trump ka ndërmarrë një linjë të ashpër ndaj Katarit, duke e akuzuar atë se po sponsorizon “në nivel të lartë” terrorizmin. Sidoqoftë, vende arabe të përfshira në krizë janë të gjitha aleate të ngushta të Uashingtonit. Baza më e madhe ushtarake në Lindjen e Mesme e Shteteve të Bashkuara ndodhet në Katar. /tesheshi.com/
