Vërshimi masiv i refugjatëve në Europë ka vënë në provë të gjitha shtetet anëtare, e secila prej tyre ka shfaqur qëndrimin e vet ndaj krizës, të ndikuar nga historia, tradita, politika e ditës, faktorët ekonomikë e socialë. Në të gjithë këtë odise që vazhdon e nuk duhet se kur do ta ketë një fund, Gjermania po mban barrën më të madhe, ndihmuar nga disa shtete “miqësore” me refugjatët si Austria, apo Finlanda.
Më shumë se 17 e 500 refugjatë kanë hyrë në Gjermani dhe në Austri vetëm në dy ditët e fundit, në finalizimin e përpjekjes tragjike për t’i ikur bombardimeve e urisë në vendet e tyre.
Por, nëse në Mynih ata u pritën me duartrokitje dhe ëmbëlsira, nuk kanë munguar kritikat nga ana tjetër, për kancelaren Merkel që, sipas tyre, ka “shqyer” dyert e Gjermanisë, e po krijon një precedent të rrezikshëm. Kritikët pyesin: deri kur do të vazhdojë kjo situatë? Të njëjtën ndjesi duhet të ketë edhe kancelari austriak, Faymann, që paralajmëroi se vendi i tij do të kthehet në normalitet pas pritjes së refugjatëve që ishin bllokuar në Hungari.
Edhe Gjermania, një vend që i ndihmoi që nga fillimi refugjatët, me ritmin aktual të përshkallëzimit të krizës, nuk mund të mbajë për shumë kohë. Vetëm qyteti i Munihut priti ditët efundit mbi 17 mijë refugjatë.
Ka zëra që nuk dëshirojnë të mbajnë më peshën kolosale, edhe pse kancelarja gjermane njoftoi miratimin e fondeve shtesë, për përballimin e krizës. Sipas saj, Gjermania ka vullnetin të mirëpresë ende refugjatë, por apeloi vendet e tjera europiane të marrin më shumë përsipër.
Duket se shembulli gjerman, po e bën punën e vet. Pas apelit të Merkel, presidenti francez, Francois Hollande njoftoi se Franca do të pranojë 24 mijë refugjatë të tjerë.
Agjencia e refugjatëve të Kombeve të Bashkuara vlerëson se të paktën 366,402 refugjatë kanë kaluar detin Mesdhe gjatë këtij viti, për të mbërritur në Europë. Të paktën 2800 refugjatë kanë humbur jetën ose rezultojnë të zhdukur gjatë udhëtimeve të rrezikshme.
Shumë refugjatë kanë histori të tmerrshme për të treguar, një vuajtje me seri për të kaluar Mesdheun, pastaj udhëtimi nga Greqia drejt Maqedonisë, Serbisë, Hungarisë dhe më në fund mbërritja në Austri.
Megjithëse udhëtimi ishte I gjatë e I vështirë dhe pritja në Austri mjaft miqësore, ata duan të shkojnë më tej, në Gjermani. Nga mijëra njerëz që mbërritën gjatë fundjavës, vetëm shumë pak aplikuan për azil, pjesa tjetër vijoi udhëtimin.
Por, rreziqet nuk mbarojnë kur ata e bëjnë edhe hapin final, mbërritjen në “tokën e premtuar”. Aty ka rreziqe, gjithashtu. Një numër qendrash të strehimit të azilkërkuesve janë përfshirë nga flakët javët e fundit e ka pasur edhe të lënduar. Protestat e ekstremistëve vijojnë.
E gjitha mbetet një kuadër me një balancë delikate e ndërsa Europa nuk po gjen zgjidhje të përbashkët për të menaxhuar fluksin e refugjatëve, në mendjen e secilit mbetet pyetja sesa do të durojë fuqia gjermane në përballimin e krizës. /tesheshi.com/
Përgatiti: Juli Prifti
