Nga Ermir Hoxha
Partia Demokratike ndodhet sot, pos të tjerash, edhe në një krizë ligjërimore. Komunikimi, si një ndër pikat më delikate të afirmimit publik, fitues apo humbës zemrash, nuk ka pësuar asnjë lloj risie apo reformimi në PD. Gjuha e saj zyrtare, është po ajo e Berishës: akuza në seri e të thjeshtëzuara deri në rëndomësi. Plus që ngjajnë shumë arkaike në raport me kohën dhe kontekstin. Dhe kjo në PD përfaqsohet vetëm nga një grusht njerëzish, gjithnjë me Berishën në krye, që janë në llogoren e parë të ligjërimit. Prurjet e reja pas zgjedhjeve të 25 qershorit, as që ndihen.
Kjo u vu re dhe seancën e së enjtes. Ajo nisi me një interpelancë për inceneratorët, kërkuar nga deputetja Jorida Tabaku ndaj ministrit Gjiknuri. Znj. Tabaku ofroi një model të kompetencës në fushën e saj, në përgatitjen për çështjen në fjalë, sa i dha seriozitet por dhe besueshmëri deri diku pretendimeve të opozitës për abuzime në dhënien e konçensioneve. Le ta pranojmë, deputetja Tabaku është për momentin, si ndër pjesëtaret e llogores së parë të ligjërimit opozitar, nderi dhe dinjiteti, ndonëse fragmentar, i familjes së saj politike.
Por kur çështja kaloi tek pedagogët e UT, tek ata që së fundi janë trazuar nga vonesa e rrogave e dhjetra problematika të brendshme në raport me zbatimin e Ligjit të ri për Arsimin e Lartë, fjalën e morri…Berisha. Jo për ndonjë oponencë profesionale, të termave universitarë, fjala vjen si ish-pedagog, por për t’u lëshuar me morinë e akuzave që fyejne çdo inteligjencë mbi mesataren. Kush duhej të merrte fjalën? Valentina Duka, një ndër pedagoget e karrierës në UT, njohëse e thellë e problematikave universitare dhe me një staturë publike serioze. Por jo! Ngjan se atë e ka dënuar partia që të mos flasë, atë e Romeo Gurakuqin, Oriola Pampurin apo doktor Halim Kosovën, emra që do i bënin nder çdo force politike. Ndërsa PD i mban të konservuar. Ne vend të tyre, zgjedh të përfaqsohet me kualitetin më të ulët ligjërues, në cilësi e jo sasi, me Berishën në ballë.
Gjithsesi ka një risi: mungon Arben Ristani! Siç ka dhe një habi: përse nuk lejohet të flasë Grida Duma? /tesheshi.com/
