Nga Blendi Gashi
Se çfarë po ndodh në politikën e Prishtinës, po posaçërisht Kuvendin e Kosovës, askund nuk po shihet dritë në fund të tunelit. Palët janë pozicionuar fort në istikamet e qëndrimeve të tyre dhe nuk luajnë vendit.
Edhe pse nuk dihet se kur ose si do të tejkalohet kjo krizë politike, dikush duhet të mbajë përgjegjësi për këtë krizë të paprecedent që po i ndodh jetës parlamentare në Kosovë.
Politologu Albinot Maloku, thotë se kriza politike nuk guxon të tejkalohet pa dhënë dikush llogari dhe ajo nuk duhet vetëm të menaxhohet, ngase po bëhet rutinë e normalitet në Republikën e Kosovës. 
“Opozita apo pozita nuk guxojnë që ta tejkalojnë këtë krizë politike pa gjetur zgjidhje përfundimtare e një herë e mirë të fillon serioziteti e përgjegjësia në vendin tonë. Gjakrat nxehen, qytetari frustrohet, vendi stagnon e pëson humbje pa dhënë askush llogari dhe vetëm duke e tejkaluar krizën politike, institucionale e ekonomike në vend. Kjo rutinë me këto jo seriozitet e përgjegjësi nga spektri politik përveç se e turpshme, është e dëmshme nga se e humbet arsyen”, ka thënë Maloku, për tesheshi.com.
Njohësi i rrethanave politike në vend, Fatmir Sheholli, ka deklaruar për tesheshi.com se mosmiratimi i ligjeve në Parlament do të sjellë pasoja të pariparueshme për qytetaret e Kosovës. 
“Është e çuditshme se si pushteti dhe opozita nuk gjejnë gjuhë të përbashkët për tejkalimin e situatës së krijuar. Thjesht, e gjithë estabilishmenti politik në Kosovë mban përgjegjësi për këtë krizë politike. Frikësohem që një situatë e këtillë mund të na dërgoj në rrugë pa krye dhe në situata shumë konfliktuoze”, shprehet Sheholli.
Analisti politik, Ali Hertica, ka thënë për tesheshi.com se për të gjitha këto sjellje në Parlamet dikush do duhej të përgjigjet pasi skenat e tilla i ngjajnë zhanreve të kriminalitetit. Sipas Herticës ajo që po ndodh në politikën kosovare është një çmenduri politike dhe inate mes liderëve, që e çojnë shtetin në një rrugë jodemokratike.
“Opozita dhe pozita janë përgjegjëse të kësaj krize të çmendur. Kosova duhet të dëshmohet se është shtet ku sundon ligji, dhe askush nuk ka të drejtë të jetë mbi të, as politikanët, as komandantët. Qytetarët nuk ia kanë dhënë votat deputetëve që Parlamentit ta kthejnë në arenë krimi. Shkelësit e ligjit duhet të dënohen nëse shteti i Kosovës dëshiron të jetë shtet me të vërtetë”, është shprehur Hertica. /tesheshi.com/
