Nga Blendi Gashi
Ndërsa gazi lotsjellës ishte problematika më e madhe në legjislaturën e katërt të Kuvendit të Kosovës, pasi u pamundësua zhvillimi normal i punimeve, legjislatura e pestë, aktualja, po ërballet vazhdimisht me mungesë të kuorumit.
Për periudhën janar – mars të këtij viti, sipas Institutit Demokratik të Kosovës (KDI) nga tetë seanca sa ka mbajtur Kuvendi, të gjitha janë shtyrë për mungesë kuorumi, e të cilat janë përcjellë me vazhdime madje deri në katër herë.
Ndonëse në listat e pjesëmarrjes të seancave të mbajtura për këtë periudhë kohore janë nënshkruar 90% e deputetëve, një numër i konsiderueshëm i tyre nuk kanë qëndruar në sallë deri në përfundim të seancës, çka për rrjedhojë votimi i pikave të rendit të ditës është bërë i pamundur.
Dështimi i shpeshtë i seancave të Kuvendit e ka lënë prapa atë sa i përket miratimit të ligjeve, për më tepër ka ndikuar edhe në prolongimin e shumë çështje të parapara për shqyrtim dhe stërngarkimin e seancave me shumë pika të rendit të ditës.
Ky “komoditet” i deputetëve për të mos qëndruar deri në përfundim të seancave dhe për të përfituar pagat t pa pjesëmarrje të plotë në punimet e Kuvendit, vjen edhe nga mungesa e sanksionimit të këtyre veprimeve me anë të Rregullores, e cila parasheh dënime për deputetët vetëm në rast të mungesës në Kuvend për më shumë se gjashtë muaj, por nuk specifikon ndëshkime tjera për numrin e madh të mungesave.
Përderisa Rregullorja e Re e Punës së Kuvendit është në procedurë të shqyrtimit, deputetët do kenë mundësi të ndjekin praktikën e njëjtë.
Për 3 muaj 8 seanca të shtyra për mungesë kuorumi
Të dhënat e KDI-së tregojnë se gjatë tre muajve të parë të këtij viti 8 seanca janë shtyrë në mungesë kuorumi, pasi 90 % e deputetëve janë nënshkruar si pjesëmarrës në seanca, por që nuk kanë qëndruar shumica prej tyre deri në përfundim të punimeve.
Në seancën e 25 janarit janë nënshkruar 110 deputetë pjesëmarrës, të 8 shkurtit 107 pjesëmarrës, të 2 marsit poashtu 107 pjesëmarrës, 8 marsit 94 pjesëmarrës, 13 marsit 97 pjesëmarrës, 14 marsit 115 pjesëmarrës, 16 marsit 113 pjesëmarrës, 23 marsit 108 pjesëmarrës.
Pra nëse kihet parasysh pjesëmarrja e deputetëve, asnjëra prej këtyre tetë seancave nuk do të duhej të dështonte në mungesë kuorumi. Kjo praktikë ka vazhduar edhe në seancat që janë mbajtur në muajin prill.
Këtë vit deri më tani Kuvendi ka miratuar veç 22 ligje (16.92%), në procedure janë 42 (32.31%) dhe në pritje 66 (50.77%). /tesheshi.com/
