Kriza e shpërthyer me vendimin e disa vendeve arabe për të ndërprerë marrëdhëniet diplomatike me Katarin nuk duket se do të përfundojë me kaq, pavarësisht ndërmjetësimit për ta lënë atë pas.
Tani Katari kërcënohet dhe nga një embargo ekonomike, çka do ta përshkallëzonte më tej krizën. Emiratet e Bashkuara Arabe kërcënuan me vendosjen e një embargoje të tillë, e në të njëjtën kohë Bahrejni e bëri të qartë se mbi tavolinë ishte çdo alternativë e mundshme.
Sipas Al Jazeera-s, ministri i Punëve të Jashtme të Emirateve të Bashkuara Arabe, Anwar Gargash, i ka deklaruar agjencisë së lajmeve Reuters se, nëse është e nevojshme, do të ketë më tepër kufizime ekonomike mbi Katarin.
I njëjti shtetar i tha më vonë televizionit France 24 se çdo hap i mëtejshëm do të merrte formën e një lloj embargoje mbi Katarin.
Gargash do të nënvizonte megjithatë se masat nuk synonin ndryshimin e udhëheqësisë në Katar, por të politikës së ndjekur.
“Kjo nuk ka të bëjë me ndryshimin e regjimit, por me ndryshimin e qasjes, me ndryshimin e politikës,” i, tha ai AFP-së.
Katari është akuzuar nga vendet e Gjirit e nga disa vende të tjera që kanë ndërprerë marrëdhëniet me të se mbështet terrorizmin. Një akuzë e hedhur poshtë nga Katari si e pabazë, që po ashtu e ka quajtur të pajustifikuar ndërprerjen e marrëdhënieve diplomatike. /tesheshi.com/
