Ministrja britanike për Mjedisin u bë objekt batutash ditën e djeshme pasi u sugjeroi bashkatdhetarëve të hanin rrepë ndërkohë që ka mungesë të frutave dhe perimeve, veçanërisht domateve dhe specave, të cilat janë të mangëta në Britaninë e Madhe.
Për shkak të mungesës, dyqanet kufizojnë shitjen e frutave dhe perimeve për t’i vënë ato në dispozicion të sa më shumë klientëve. Mungesa është rezultat, thotë shoqata e tregtarëve BRC, e kushteve të këqija të motit në jug të Evropës dhe në Afrikën e Veriut. Ministrja e Mjedisit Therese Coffey i tha Parlamentit dje se mungesa mund të zgjasë edhe “dy deri në katër javë”.
“Zinxhirët e shitjes me pakicë ende importojnë shumë prodhime. Ne me të vërtetë duhet të hamë më shumë fruta dhe perime sezonale dhe të mbështesim fermerët tanë britanikë,” reagoi deputetja konservatore Selaine Saxby.
“Shumë njerëz preferojnë të hanë rrepë tani sesa të mendojnë për marule dhe domate,” tha ministrja, duke iu referuar perimeve të kultivueshme në Britani në këtë kohë të vitit.
“Megjithatë, jam e vetëdijshme se konsumatorët duan të kenë zgjedhje gjatë gjithë vitit”, shtoi ajo.
Pas reagimeve të shumta, zëdhënësi i Downing Street tha se ministrja ka dashur të “kujtojë perimet që rriten në Britaninë e Madhe”.
“Të gjithë vendosin përfundimisht se çfarë ushqimesh të blejnë,” shtoi ai.
Një zëdhënës theksoi se mungesa nuk ishte e lidhur me Brexit.
Ministrja tashmë është kritikuar ashpër kur sugjeroi që britanikët të cilëve ushqimi është shumë i shtrenjtë, duhet të punojnë më shumë orë ose të përmirësojnë aftësitë e tyre për të gjetur punë më të paguara, kujton BBC. /tesheshi.com/
