Pasi zv/kryeministrja e qeverisë serbe Zorana Mihajloviç akuzoi shefin e diplomacisë ruse, Sergej Lavrov se ka abuzuar me Serbinë në luftën kundër Ukrainës, ka ardhur një përgjigje nga Moska.
“Me deklaratat e tij Lavrov po abuzon me faktin se Serbia nuk ka vendosur sanksione ndaj Rusisë. Ai po përpiqet të tregojë se Serbia e mbështet sulmin e Rusisë ndaj Ukrainës. Serbia ka vendosur qartë kundër luftës në Ukrainë, dhe duke mos vendosur sanksione ndaj Rusisë. siç e ka bërë e gjithë Evropa, tregon se po udhëhiqet nga një politikë të pavarur”, tha Mihajloviç pak ditë më parë.
Ministria e Punëve të Jashtme ruse, duke komentuar këto deklarata, u shpreh se “me sa duket Mihajloviç është i informuar keq për realitetin” e marrëdhënieve midis këtyre dy vendeve, shkruan agjencia shtetërore ruse e lajmeve RIA Novosti.
“Me Serbinë, ne kemi një mirëkuptim të plotë të ndërsjellë për temat aktuale në axhendën ndërkombëtare. Në kontaktet me partnerët, ne e paraqesim hapur pikëpamjen tonë për situatën në Ukrainë. Ne respektojmë dëshirën e Beogradit për të mbajtur një linjë të balancuar dhe më e rëndësishmja, e pavarur në këto kushte të vështira”, theksoi Kremlini.
Diplomacia ruse shton se kjo qasje e balancuar mund të shihet në qëndrimin e rezervuar të lidershipit serb ndaj sanksioneve perëndimore.
“Natyrisht, kjo është një zgjedhje sovrane, të cilën Perëndimi nuk mund ta pranojë dhe ndryshe nga ne, ata po përpiqen të bëjnë presion mbi serbët”, thuhet në deklaratë. /tesheshi.com/
