Opozita kosovare ka kohë që ka nisur kërkesën e saj për zgjedhje të parakohshme, por që përpjekjet e saj po konsiderohen jo serioze nga partitë në pushtet.
Dy deputetët nga mazhoranca, Zenun Pajaziti i PDK-së dhe Blerim Kuçi i AAK-së kanë thënë për gazetën “Epoka e re” se zgjedhjet parlamentare e kanë afatin e vet të rregullt dhe do të mbahen në vitin 2021 dhe sipas tyre, është detyrë e opozitës ta kërkojë ardhjen në pushtet.
Ndërsa Dukagjin Gorani, deputet i Partisë Socialdemokrate, ka thënë se mungesa e vullnetit për zgjedhje të shpejta e të parakohshme u kuptua edhe në tryezat e fundit të partive politike.
Edhe pse nuk u arrit një pajtim në tryezat e organizuara nga LDK e PDK për datën e zgjedhjeve një të tillë më 25 maj do ta organizojë edhe Vetëvendosje me titull “Zgjidhja nëpërmjet zgjedhjeve”, nëpërmjet së cilës synohet arritja e konsensusit për realizimin e zgjedhjeve të parakohshme parlamentare.
Tryeza kanë paralajmëruar se do të organizojnë edhe Partia Socialdemokrate dhe Nisma për Kosovën. /tesheshi.com/
