Pas shpërthimit në Mançester që u mori jetën dhjetëra personave e plagosi shumë të tjerë, niveli i kërcënimit terrorist në Britani është çuar nga “i rëndë” në “kritik”.
Lajmërimin e ka bërë kryeministrja britanike, që ka shtuar me këtë rast se një tjetër sulm mund të jetë i afërt.
Ndryshimi në nivelin e kërcënimit ka ardhur, sipas kryeministres, pasi hetuesit e ngjarjes nuk kanë qenë në gjendje të përcaktojnë nëse i dyshuari për shpërthimin në Mançester veproi i vetëm.
Në një dalje televizive në orët e mbrëmjes të së martës, Theresa May tha se qeveria e saj nuk mund ta shpërfillte mundësinë e ekzistencës së një grupi më të gjerë të lidhur me sulmin në Mançester.
May qartësoi se në vende kyçe publike do të vendoseshin ushtarë për t’u ardhur në ndihmë forcave policore në mbrojtje të publikut, bën me dije BBC-ja.
Rritja e nivelit të kërcënimit në “kritik” do të shoqërohet me masa të shtuara sigurie. Në media raportohet se 5.000 ushtarë britanikë do të patrullojnë në rrugë, ndërkohë që personeli ushtarak do të jetë i pranishëm në veprimtari të ndryshme që mbledhin shumë njerëz, si në koncerte apo në aktivitete sportive. /tesheshi.com/
