Kreu i opozitës shqiptare, Lulzim Basha, ishte në Fier, ku u premtoi qytetarëve të atjeshëm se po të vinte ai në pushtet do jua ulte taksat dhe do u hapte shumë vende pune.
Dhe këtë vizion, Basha e shpalosi duke akuzuar qeverinë si një oligarke që po jua rrëmben të ardhurat qytetarëve, madje duke shtuar dhe një epitet tjetër ndaj saj: kuçedër.
“Çelësi i programit tonë, kyçi i ofertës së Partisë Demokratike për të nesërmen është ky: paratë që sot përfundojnë në xhepat e oligarkëve t’ia kthejmë qytetarëve përmes investimeve publike, infrastrukturë, në shëndetësi, në arsim, në kopshte, në çerdhe, në ujësjellës, në vaditje, në subvencionime për bujqësinë. Dhe nga ana tjetër të ulim taksat me qëllim që qytetarët të kenë më shumë lekë për të shpenzuar për veten e tyre dhe familjet e tyre. Të fillojë dhe të rifillojë qarkullimi i lekut, të ringrihet ekonomia bazuar mbi parime të shëndosha ku parimi numër një është largimi i, kësaj klike të korruptuar, kësaj kuçedre të parave të shqiptarëve e cila kërkon gjithçka për vete dhe asgjë për qytetarët”, tha Basha. /tesheshi.com/
