Papa Françesku do të vërë këmbë sot në Egjipt me ftesë të presidentit Abdulfettah es-Sisi; një ftesë zyrtare e bërë në vitin 2014 në Vatikan, në një takim mes tyre.
“Papa i paqes në Egjiptin e paqes,” lexohet në pankartat e mëdha rrugëve të Kajros. “Ju lutem, lutuni për udhëtimin tim nesër si një pelegrin i paqes në Egjipt,” shkruante një ditë më herët Papa Françesku në një rrjet social.
Vizita do të jetë dyditore, dhe është e para e një pape që kur Egjiptin e vizitoi Gjon Pali II në vitin 2000.
I ftuari nga Vatikani në vendin me popullsi dërrmuese muslimane do të takohet më së pari me presidentin es-Sisi, për të marrë më pas rrugën për në el-Ez’her, ku do të pritet nga imami i madh, shejh Ahmed et-Tajibi. Kjo do të jetë vizita e parë e një pape në një prej institucioneve më të njohura të botës islame.
Dy figurat klerike parashikohet të flasin në Konferencën Ndërkombëtare të Paqes. Papa do të vizitojë dhe Katedralen Ortodokse Kopte, ku dhe do të mbajë një fjalë më tej. /tesheshi.com/
