Komuna e Junikut për herë të dytë është shpërblyer me çmimin për përformancen më të mirë të treguar në qeverisjen lokale në nivel vendi. Këtë çmim e mori më 2010 dhe dje për vitin 2016-të.
Kreu i kësaj komune Agron Kuçi, si një prej më meritorëve, përveç që e quan ndjenjë të veçantë e krenarie, njëkohësisht thotë se të jesh i pari nē qeverisje lokale është përgjegjësi dhe motivim për më shumë punë në të mirë të qytetarëve.
Kuçi në një intervistë për tesheshi.com përveç që tregon se kush nga kryetarët e komunave tjera e uruan, flet edhe për infrastrukturën e përgjithshme në Junik, për vendet turistike që ja vlen të vizitohen si dhe për atë nëse do kandidohet sërish për kryetar.
Intervistoi: Blendi Gashi
Jeni shpallur komuna më e mirë për vitin 2016. Çdo të thotë kjo për ju si kryetar? Si është të jesh i pari në qeverisjen lokale?
Është një çmim shumë domethënës jo vetëm për mua si kryetar i Junikut por për të gjithë qytetarët. Ngjarja më e madhe për ne junikasit pas lirisë dhe më pas shpalljes së pavarësisë është themelimi i komunës së Junikut, sepse ka mbetur për dekada e nëpërkëmbur nga pushtetet e kaluara.
Ky çmim sigurisht se na bën krenar por edhe na inkurajon, motivon dhe na bën përgjegjës edhe për punë më të mëdha.
Për të marrë një rezultat si ky i fundit duhet të keni dhe një bashkëpunim relativisht të mirë me partitë tjera. Ç’raporte keni me kundërshtarët?
Juniku tradicionalisht është një vend shumë i qytetëruar, andaj kam edhe raporte të mira me të gjitha partitë politike, PDK-LDK dhe Vetëvendosje. Klima është e mirë, shumë liberale në komunën e Junikut. Por si factor të rëndësishëm shoh edhe ndihmën e partnerëve, bashkëpunëtorëve si vendor ashtu edhe ndërkombëtarë sepse jemi komunë e re dhe e vogël dhe pa ndihmën e tyre nuk të vinin sukseset.
A ju ka telefonuar ndonjë kryetar i komunave pas çmimit të fituar? Cili është mesazhi juaj për ta?
Kam marrë urime nga kryetarë të komunave si kryetari i Deçanit, Pejës, Drenasit, Hanit të Elezit etj, të cilët më kanë përgëzuar për çmimin. Kam bashkëpunim të mirë me ta dhe shkëmbejmë përvojat me njëri-tjetrin. Kam konsiderat për kreytarët e komiunave tjera sepse punojnë për ngritjen e shërbimeve për qytetarët.
Puna e kryetarit të komunave është sfiduese sepse politikat zhvillimore që bëhen ndikojnë në jetën e qytetarëve.
Ky çmim vjen sigurisht edhe për numrin e projekteve të realizuara. A mund të na flisni pak si është gjendja e insfrastrukturës rrugore, shkollore etj, në komunën tuaj? Pra çarë projekte keni realizuar gjatë mandatit të fundit?
Komuna që udhëheqi ka realizuar proejkte jashtëzakonisht të mëdha në infrastrukturë. Sot qytetari i Junikut nuk vuan për ujë të pijes, nuk vuan nga ujërat e zeza, ka transport për nxënësit, poashtu shërbimet komunale janë të mira, si në kulturë arsim dhe priten edhe priten reuzltate në zhvillimin e turizmit për çka pres qeveria e re të na ndihmojë.
Dihet se brengat e qytetarëve në mbarë vendin janë të mëdha. Cilat janë problemet më të theksuara të junikasve?
Një sfidë e madhe jo vetëm për komunën tone por mbarë vendin siç dihet është papunësia. Ka shumë të rinj e të reja që po kryejnë fakultetet dhe po mbesin pa punë. Edhe pse dihet se komuna nuk ofron vende pune, si gjë që më së shumti e përjetojë është kur një i ri apo e re dera e parë është që i drejtohet është kreu i komunës, por dihet se mundësitë janë shumë të kufizuara.
Sa keni pasur përkrahjen nga qeveria e kaluar dhe a pritni përkrahje më të madhe nga qeveria e re?
Me qenë korrekt si komunë nuk kemi pasur përkrahje dhe fatkeqësisht kemi qenë të anashkaluar nga qeveria “Mustafa”. Por unë jam optimist se qeveria e re do ta përkrahë komunën e Junikut.
Ju jeni kryetar qe dy mandate. Siç dihet zgjedhjet lokale do mbahen më 22 tetor. A do garoni sërish?
Kam marrë besimin e qytetarëve të Junikut por edhe të subjektit që i takoj, kështu që do të jem kandidat sërish për kryetar komune.
Për fund, pse duhet turistët ta vizitojnë komunën më të mirë në Kosovë? Cilat vende ja preferoni?
Natyrisht se Juniku veçohet si një vend turistik dhe për një trashëgimi të veçantë. Ekzistojnë shumë kulla që paraqesin një trashëgimi kulturore historike, poashtu gjendet Maja e Gjeravicës me dy liqejt natyror, lumi Erenik, bjeshkët e Junikut, e monumente të tjera të shumta. Pra është një atraksion i vërtetë që nuk e kanë shumë komuna tjera në vend. /tesheshi.com/
