Zgjidhja e situatës së tensionuar politike në Kosovë ka vënë në lëvizje të gjithë partitë politike, si ato parlamentare por edhe ato jashtë parlamentit, të cilët përpiqen të gjejnë një zgjidhje apo një shteg për të kapërcyer këtë ngërç të krijuar, i cili nuk krijon probleme në klasën politikë, sesa krijon tek populli i Kosovës.
Situata politike dhe gjetja e rrugëve të kapërcimit të saj ka qenë kryefjala e diskutimeve në takimin që republikanët e Kosovës, nëpërmjet kryetarit Faton Kurti, kanë zhvilluar në Shqipëri me kryetarin e PD-së Lulzim Basha dhe ish-kryeministrin Sali Berisha.
Z. Kurti u shpreh se “kriza qeverisëse që po kalon aktualisht Kosova, po shton edhe me shumë problemet ekonomike dhe po rrit papunësinë në vend. Qytetarë të ndryshëm të Kosovës, por më shumë të rinj po kërkojnë të largohen çdo ditë dhe më shumë nga vendi, për të gjetur një jetë më të mirë në vendet e BE”.
Duke kritikuar mënyrën e të bëri politike deri më tani, z. Kurti u shpreh se ata si forcë politike mbështesin protestat e qytetarëve, por janë kundër çdo dhune ne institucionin e Kuvendit.
Nga ana e tij z. Basha u shpreh se ndjek me vëmendje situatën në Kosovë dhe kërkon që palët të ulen dhe të gjejnë një zgjidhje ligjore për kapërcimin e këtij ngërçi.
Z. Basha tha se ka ndjekur me shumë vëmendje takimet që Republikanët e Kosovës kanë zhvilluar me republikanët Serbë dhe ata shqiptarë. “Ju inkurajoj për bashkëbisedimet me Serbinë dhe zgjerimin e tyre edhe në rajon”, u shpreh z. Basha.
Nga ana e tij z, Kurti theksoi se ky takim ka ardhur për faktin se duhet të ndryshohet politika në Ballkan që të ecim përpara dhe për këtë duhet të punojmë të gjithë.
Më pas z. Kurti dhe delegacioni që e shoqëronte janë pritur në takim nga ish kryeministri Sali Berisha.
Z. Berisha ju uroi mirëseardhjen mysafirëve dhe u shpreh se ai ndjek me vëmendje gjithë situatën politike në Kosovë. “ Situata në Kosovë është shumë problematike, e ndjek me interes të madh dhe nuk jam dakord me aktet e dhunës që bëhen në parlament , jam për respektim të ligjit”, u shpreh Berisha.
Gjithashtu z. Kurti kërkoi që klasa politike shqiptarë të japë kontributin e saj për qetësimin dhe kapërcimin e ngërçit politik të krijuar në Kosovë, pasi kjo nuk i shërben popullit.
