Një ditë para nisjes së muajit Ramazanit, i cili veçohet dhe për masivitetin e shtuar të besimtarëve në xhami, kreu i KMSH-së Bujar Spahiu ka lënë të kuptuar në një fjalë përshëndetëse se ato mund të hapen ndoshta në mes këtij muaji, gjë që korrespondon me faza të avancuara lirie shoqërore të paralajmëruara nga qeveria.
“Situata e krijuar nga Covid-19 na ka detyruar që Ramazanin këtë vit ta përjetojmë kryesisht brenda një rrethi të ngushtë dhe familjar, me shpresën dhe lutjet që tubimet për teravi, namaze nate dhe përjetimi i këtij muaji në xhemat të kthehet sa më shpejt”, u shpreh Spahiu.
Ai gjithsesi nuk e dramatizoi mungesën e xhamisë këtë Ramazan, duke thënë se ajo mund të zëvëndësohet edhe nga ambienti familjar dhe punët e mira në të.
“Të nderuar besimtarë, situata në të cilën jetojmë na ka detyruar të qëndrojmë më shumë në shtëpi dhe të kalojmë një kohë më të gjatë, me fëmijët tanë, më bashkëshortet dhe me prindërit.
Le ta shfrytëzojmë këtë kohë për të kaluar më shumë kohë produktive me fëmijët, t’ju mësojmë atyre bukuritë e besimit tonë, t’ju mësojmë librin e Zotit dhe të krijojmë një ambient ku ata të kënaqen.Bashkëshortët të jenë mbështetje për njëri-tjetrin.
Gjithashtu për të gjithë ata që jetojnë bashkë me prindërit të shtojnë sjelljet e mira ndaj tyre, fjalët e ëmbla dhe të bukura.
Mos t’i harrojmë ajetet Kuranore dhe hadithet e Profetit Muahmed a.s mbi respektin dhe sjelljet ndaj prindërve”, deklaroi njeriu i parë i muslimanëve shqiptarë.
Ndërsa sa për iftaret e munguara kolektive, ai këshilloi që t’u jepen të pamundurve.
Të nderuar besimtarë, mos të harrojmë gjatë këtyre ditëve edhe ata të cilët kanë nevojë për ndihmën tonë. Iftaret tona të përvitshme le t’i kthejmë në ndihma për familjet në nevojë”, theksoi kreu i KMSH-së. /tesheshi.com/
