Drejtori i CIA-s William Burns vlerësoi se presidenti rus Vladimir Putin, i përballur me vështirësi në Ukrainë, e di se tani për tani nuk mund ta fitojë luftën, por se është i sigurt për fitoren përfundimtare.
“Putini, për mendimin tim, mendon sot se nuk mund të fitojë menjëherë, por nuk mund të përballojë të humbasë”, tha Burns për rrjetin televiziv amerikan CBS.
Sipas tij, Putin është plotësisht i vendosur dhe i sigurt në aftësinë e tij për të “shteruar Ukrainën”.
“Dhe në vend që të mendojë për një rrugëdalje, presidenti rus është ‘këmbëngulës’,” tha Burns.
Ai shprehu shqetësimin për rritjen e bashkëpunimit ushtarak midis Moskës dhe Teheranit, duke vënë në dukje se iranianët “tashmë i kanë furnizuar rusët me dronë që janë përdorur në luftën në Ukrainë”.
Më 24 shkurt 2022, Moska filloi pushtimin e saj në Ukrainë. Në vitin e parë të luftës, dhjetëra mijëra njerëz vdiqën, duke përfshirë mijëra civilë, miliona u bënë refugjatë dhe disa qytete u shkatërruan plotësisht.
Ekspertët paralajmërojnë se konflikti më i madh në Evropë që nga Lufta e Dytë Botërore mund të zgjasë me vite dhe ka frikë në rritje se mund të kthehet në një konflikt të drejtpërdrejtë midis Rusisë dhe NATO-s. /tesheshi.com/
