Kreu i Aleancës Kuq e Zi, Kreshnik Spahiu është shoqëruar në polici paraditën e sotme, ndërsa bashkë me aktivistë të tjerë të kësaj aleance kanë gozhduar dhe kyçur tre dyert hyrëse për në bashki, për të mos lejuar hyrjen e kryebashkiakut Erion Veliaj.
Policia bën me dije se bashkë me Spahiun është shoqëruar edhe nënkryetari i Aleancës Kuq e Zi, Flavio Qarri.
“Shoqërimi i tyre është bërë lidhur me protestën e paligjshme të zhvilluar gjatë ditës së sotme në ambientet e jashtme të Bashkisë Tiranë, si dhe veprimet e kundraligjshme të kryera nga ana e tyre gjatë protestës”,- thotë policia në një deklaratë zyrtare.
Nga ana tjetër, demokrati Flamur Noka e cilëson arrestim politik, shoqërimin e kreut të Aleancës Kuq e Zi, Kreshnik Spahiu në polici. Sipas Nokës, shteti po përpëlitet.
“Të arrestosh kreun e një partie pse zhvillon një protestë do të thotë se drita e shtetit ligjor nuk ekziston në këtë vend, por se kërkon të kthehet diktuatura. Kjo qeveri është në panik dhe në ditët e saj të fundit. Nuk ka vend në botë që të ndodh kjo gjë, të arrestohet kreu i një partie në zyrë, si të ishte kriminel dhe vrasës”, – tha ndër të tjera Flamur Noka. /tesheshi.com/
