Media të ndryshme, e sidomos portalet, kanë transmetuar me shumicë sot videu të shoqëruara me okelion “kujdes, pamje të rënda”, ku jepen sekuenca të një rituali të përgjakshëm nga ana e besimtarëve shiitë, të cilët duke u vetëfshikulluar me shpata e thika, përkujtojnë betejën e Qerbelasë. Por si çdo vit, këto pamje vënë në siklet klerikët myslimanë të cilët rreken të sqarojnë se ata janë sekte krejtësisht të devijuara që nuk kanë të bëjnë aspak me Islamin e pastër apo traditën profetike, që nuk njeh e as që ka promovuar ndonjëherë rituale të tilla vërtet makabre.
Ja si shprehet njëri prej tyre në FB:
Ditën në të cilën muslimanët duhet ta kalojnë me adhurim duke agjëruar, këta e kthyen në ditë hidherimi dhe vajtimi. Allahu na ruajt na devijimi!
Shikoni se çfarë shkruajnë mediat, që mezi presin evenimente të tilla për të nxjerrë në pah injorancën dhe dashakeqësinë e tyre: “Këto imazhe shokuese tregojnë se si djemtë myslimanë masakrojnë veten me shpata si pjesë e një rituali në Ditën e Ashures. Çdo vit, myslimanë në mbarë botën përkujtojnë Betejën e Qerbelasë, duke lënduar veten. Kjo ditë përkujtohet edhe nga bektashinjtë shqiptarë.”
Sipas klerikëve myslimanë, nuk është aspak e vërtetë që myslimanë në të gjithë botën përkujtojnë Qerbelanë. Pasi bëhet fjalë vetëm për sekte shiizmi që sigurisht nuk gjenden në të gjithë botën, por që hasen në Iran e ca vende të tjera rreth e rrotull. Sipas tyre ata janë sekte krejtësisht të devijuara, ku për disa disa as myslimanë nuk duhet të quhen, sipas rrënjës kuptimore të këtij emri për të cilin duhen përmbushur disa kritere besimi për ta merituar, e që atyre u mungojnë. /tesheshi.com/
