E gjithë narrativa opozitare e 30 Qershorit u soll në denoncimin e kësaj date zgjedhjesh si ilegjitime. Argument për këtë, në dukje shumë logjik, ishte të zhvilluarit e tyre pa opozitën. Kjo bëri që procesi të sulmohej ashpër dhe me lëndë nga diktatura, për t’i zhvlerësuar sa më shumë në sytë e elektoratit.
Këtë tezë mbrojti dhe presidenti Meta, i anuar qartazi kah opozita, deri dhe i konsideruar ideator okult i djegies së mandateve dhe bojkotit të zgjedhjeve. Me një akt të paprecedent, ai anulloi 30 Qershorin njëanshmërisht, pa asnjë konsultë apo marrëveshje mes partive, siç ka ndodhur dhe në raste të mëparshme, duke u kujtuar vetëm pas më shumë se një muaji për një tjetër datë, të cilën më së pari faktori ndërkombëtar, i cili qartazi përkrahu dhe njohu 30 Qershorin, nuk ia ka marrë kurrë në konsideratë, pra 13 Tetorin.
Ilegjitimitetin e 30 Qershorit, Meta e denoncoi sërish në një intervistë të fundit për median italiane, duke thënë se ato ishin si në kohën e monizmit.
E sërish duke bërë një krahasimmë futbollit, një lojë ku njihet rezultati në tavolinë – humbja për çdo skuadër bojkotuese – deri dhe ndëshkim me përjashtim nga kompeticionet, po sjellim në kujtesë se dhe Kombëtarja shqiptare ia arriti të shkojë në një Europian me anë të një rezultati virtual, kur në tavolinë ju dha një fitore 3-0 ndaj Serbisë.
Në realitet, Serbia na mundi 2-0 në “Elbasan Arena”, e vetëm falë atij rezultati 3-0 ligjor e jo real, Shqipëria shkoi në Francë. Ndaj, Meta dhe opozita në përgjithësi, nëse ecin me mënyrën e deritanishme të të gjykuarit të 30 Qershorit, duhet të jenë kundër dhe ndaj asaj pjesëmarrjeje të Shqipërisë në Europian.
Sepse, edhe Shqipëria fitoi një ndeshje pa garë reale, që për më tepër qe përcaktuese në shkuarjen e saj në Europian. /tesheshi.com/
