Gjykata e Lartë e Podgoricës ka dënuar sot shtetasin e vet malazez Vlado Zmajeviçin me 14 vite burg për krime lufte kundër popullatës civile gjatë luftës në Kosovë në vitin 1999. Zmajeviç, i lindur dhe i rritur në Nikshiq të Malit të Zi, ishte bërë vullnetarisht pjesë e paramilitarëve serbë. Aso kohe, Mali i zi ishte pjesë e ish-Jugosllavisë. Vendimin e shkallës së parë e dha kryetari i trupit gjykues, Dragoje Joviç. Prokuroria Speciale e ngarkoi Zmajeviçin me vraje të katër civilëve.
“Zmajeviç, gjatë konfliktit të armatosur në mes të anëtarëve të armatosur të organizatës ushtarake të ashtuquajtur UÇK-së dhe ushtarëve të ushtrisë jugosllave ka shkelur ligjin ndërkombëtar nga Konventa e Gjenevës lidhur me Mbrojtjen e Personave Civilë në Kohë Lufte. Zmajeviç ishte anëtar vullnetar i batalionit të këmbësorisë, dhe kreu vrasje ndaj personave që nuk kanë marrë pjesë direkt në luftime, pjesëtarë të nacionalitetit shqiptar. Ai nuk ka vepruar në asnjë rrethanë në mënyrë njerëzore, pa asnjë ndasi në bazë të origjinës kombëtare, fesë apo besimit, por ka kryer vrasje të civilëve shqiptarë si dhe ka plaçkitur pronat e tyre”, thotë aktakuza.
Zmajeviç ndodhej në paraburgim që 4 gushti i vitit 2016. /tesheshi.com/
