Rezultatet e arritura në zgjedhjet vendore të 21 Qershorit “shpërblejnë” LSI-në tashmë edhe në terma financiarë. Komisioni Qendror i Zgjedhjeve ka ripërllogaritur financimin e partive sipas votave që ato morën në zgjedhje, dhe duket se në të gjithë këtë llogari, LSI del më e fituara.
Më shumë se 250 mijë votat e marra në zgjedhje i kanë dhënë LSI-së edhe para shtesë nga fondi i KQZ-së me gati 6,810,293 lekë shtesë mbi paratë që iu dhanë para zgjedhjeve.
Para shtesë do të marrin edhe Fryma e re Demokratike, e partia Demokratike, në një shumë modeste.
Ndërsa socialistët kanë qenë mëse të parashikueshëm për KQZ-në, e cila i ka dhënë atyre para zgjedhjeve një shumë që pothuajse përputhet me votat e marra.
KQZ pritet të kërkojë mbrapsht paratë nga disa parti që “zhgënjyen” pritshmërinë në marrjen e votave, mes të cilave edhe republikanët e Mediut, socialdemokratët e Gjinushit apo demokristianët e Nard Ndokës. /tesheshi.com/
