Komisioni Qendror i Zgjedhjeve ka shtyrë kërkesën për heqjen e mandatit të deputetëve Aqif Rakipi(PDIU) dhe Gledion Rehovica(LSI), pasi nga doumentet e sjella nuk kishte asnjë vendim gjykate apo prokurorie në Itali kundër tyre.
KQZ i kërkoi informacion shtesë prokurorisë deri më datën 5 janar, për të vendosur më pas çdo të bëjë.
Denar Biba, nënkryetar i KQZ-së tha se kërkesa për dy deputetët nuk ka firmën e Kryeprokurores, por vetëm të prokurores Rovena Gashi.
Anëtari i LSI në KQZ, Veleshnja, por edhe avokati i deputetit Ardian Visha u shprehën se ka shumë paqartësi në informacionin e Prokurorisë. “Për herë të parë ndeshemi me termin raportim policor. Në një stacion policie mund të shkojnë shumë raportime brenda ditës më pas vendoset nëse do të ketë procedime. Në pjesën e dytë të akuzës thuhet ‘të dhënat e përcjella nga drejtësia italiane, por nuk thotë kujt institucioni i referohet’. Sqarimi i këtyre dy momenteve është shumë me rëndësi”, tha Veleshnja.
E njëjta tablo ishte edhe për rastin e Aqif Rakipit, për të cilin KQZ vendosi shtyrjen e vendimit për ditën e premte pas marrjes së informacioneve shtesë nga prokuroria. Rakipi nuk ishte i pranishëm, por avokati i deputetit të PDIU, Dhori Sollaku pas kërkesës drejtuar prokurorisë se duhet të sjellë të gjitha aktet ku e mbështet vendimmarrjen shtoi se argumenti më i fortë është se ky vendim është bërë pa certifikimin e Prokurorit të Përgjithshëm.
“Gjithë ky material duhet të certifikohen medoemos nga kryeprokurori. Nëse nuk pranohet kjo, ne kemi dhe kërkesa të tjera lidhur me dosjen. Është shumë e domosdoshme që KQZ t’i kërkojë Prokurorisë cilat nga pikat e nenit 2 të Dekriminalizimit kap deputetin, sepse ligji parashikon se nuk mund të kandidosh apo duhet të të ndërpritet mandati, kur je dënuar. Kjo nuk ekziston, Prokuroria duhet të sjellë aktet ku e mbështet këtë vendimmarrje. Duhet të qartësohet situata. Çdo pretendim i ngritur nga akuza duhet të shoqërohet me një akt”, tha Sollaku. /tesheshi.com/
