Komisioni Qendror i Zgjedhjeve i ka bërë të gjitha përgatitjet për zgjedhjet e 11 qershorit, edhe pse para vetës kanë një kohë tejet të shkurtër. Kështu ka thënë kryeshefi ekzekutiv i Sekretariatit të KQZ-së, Enis Halimi, në RTK, ku ka folur edhe për zgjedhjet lokale që do të mbahen po ashtu këtë vit.
“Megjithë vështirësitë që na paraqet koha e shkurtër për ne, unë besoj që do t’ia dalim. Ne kemi bërë planin operacional”, ka thënë ai.
Megjithatë, ai ka pranuar se procesi i tëri nuk mund të ec në rregull, ku ka pranuar se lista e votuesve nuk është krejtësisht e pastruar.
“Asnjë shtet nuk e ka listën zgjedhore të pastruar. Përveç kësaj ne kemi edhe një diasporë që kanë shtetësi të dyfishtë”, ka thënë ai, duke dashur të arsyetohet.
Sipas tij, mundësia për manipulime nuk duhet të shikohet nga ajo, se lista zgjedhore do të jep mundësi për manipulime.
Ai ka bërë me dije se fushata do të fillojë më 1 deri më 10 qershor. /tesheshi.com/
