Nga 28 subjekte politike që kanë aplikuar për certifikim për zgjedhjet 14 shkurtit në Kosovë, 15 prej tyre kanë kandidatë “problematikë’ referuar nenit 29 të Ligjit për Zgjedhjet. Kjo u tha nga zëdhënësi i KQZ-së Valmir Elezi.
Sipas tij, kjo është përgjigjja që KQZ-ja ka marrë nga Këshilli Gjyqësor i Kosovës.
Ai i bëri të ditur medias se ky institucion ka kërkuar nga Paneli Zgjedhor për Ankesa dhe Parashtresa, Këshilli Gjyqësor i Kosovës, Ministria e Punëve të Jashtme dhe Agjencia e Kosovës për Inteligjencë konfirmimin për përshtatshmërinë e kandidatëve për deputetë, bazuar në nenin 29 të Ligjit për Zgjedhjet e Përgjithshme.
Në bazë të këtij ligji kandidat për deputet nuk mund të jetë një person i cili është shpallur fajtor për vepër penale me një vendim përfundimtar të gjykatës në tri vitet e fundit.
“Në përgjithësi, janë 47 kandidatë nga rreth 1,080, të cilët janë shpallur fajtorë për vepër penale me një vendim përfundimtar të gjykatës në tri vitet e fundit”, ka thënë Elezi.
Por ai nuk ka pranuar të bëjë publike emrat e tyre, duke nxitur kështu spekullime. Prej tyre është ajo se në këtë listë mund të jetë dhe Albin Kurtit, i cili konsiderohet si fitues i mundshëm i zgjedhjeve, për të qenë më pas sërish kryeministër. Kjo pasi dhe për Kurtin ka patur një proces gjyqësor ndaj tij.
Elezi ka sqaruar që në rast se ndonjë subjekt politik apo kandidat nuk certifikohet, ai mund të paraqesë ankesë dhe se çështja mund të shkojë deri në Gjykatën Supreme, nëse pala mund të jetë e pakënaqur me vendimin. /tesheshi.com/
