Një lajm i mirë për Kosovën ka ardhë nga punimet e Asamblesë Parlamentare të Këshillit të Evropës, që po mbahen në Strasburg të Francës, ku po merr pjesë nënkryetari në detyrë i Kuvendit Xhavit Haliti.
Për herë të parë, delegacionit kosovar i është lejuar ulësja në sallën plenare të AP të KE-së. Lajmin e ka bërë të ditur Haliti, ndërsa ka shtuar se Kosova ka siguruar edhe zyrë për herë të parë brenda një institucioni ndërkombëtar.
Haliti më tej thotë se përpjekjet do të vazhdojnë që Kosova të bëhet anëtare e barabartë me vendet tjera në Këshillin e Europës e Bashkimin Europian, ndërsa ka bërë të ditur se gjatë qershorit presin që të zgjidhet edhe raportuesi i KE-së për Kosovën.
“Gjatë sesionit të qershorit, presim që të zgjidhet edhe raportuesi i KE-së për Kosovën. Kështu që Kosova do të vazhdojë të jetë temë e përhershme e debateve në AP të KE-së, dhe do ketë mundësi edhe më të mëdha që të prezantojë të arriturat demokratike, ashtu siç do përpiqemi që raportet bilaterale në mes të vendit tonë e vendeve anëtare të KE-së dhe atyre me status tjetër të përmirësohen e të bëhen të përhershme”, ka thënë ai. /tesheshi.com/
